आषाढीनिमित्त वारकऱ्यांनी प्रत्येकी एक रोप लावावे ः सयाजी शिंदे

नातेपुते, जि. सोलापूर : कोरोना संसर्गाने या वर्षी आषाढी वारी होणार नाही. परंतु, संतांना अपेक्षित वृक्षवल्ली आम्हा सोयरे या उक्तीप्रमाणे वारकऱ्यांनी प्रत्येकी एक रोप लावावे. आषाढी एकादशीदिवशी या रोपाची संत व पांडुरंग म्हणून पूजा करावी, असे आवाहन सिने अभिनेते व सह्याद्री देवराईचे संस्थापक सयाजी शिंदे यांनी केले.

संत ज्ञानेश्‍वर महाराज व संत तुकाराम महाराज पालखी मार्गालगत मुक्कामाच्या गावांत वृक्षारोपणाचा प्रारंभ सयाजी शिंदे यांच्या प्रमुख उपस्थितीत करण्यात आला. त्या वेळी ते बोलत होते. या वेळी आळंदी देवस्थानचे विश्‍वस्त व पालखी सोहळाप्रमुख ॲड. विकास ढगे-पाटील, पंढरपूर देवस्थानचे विश्‍वस्त शिवाजीराव मोरे, तुकाराम महाराज मोरे, देवस्थानचे विश्‍वस्त मधुकर मोरे, अजित मोरे, सह्याद्री देवराईचे रोहित पाटील, रघुनाथ ढोले, किशोर ठाकूर, आळंदी देवस्थानचे मनोहर अवचर, बाळकृष्ण मोरे व नातेपुतेचे सरपंच भानुदास राऊत आदी उपस्थित होते.

अभिनेते शिंदे म्हणाले, परदेशी रोपांची लागवड अजिबात करू नका. देशी रोप प्रत्येकाने लावावे. विशेषत: आवळा, लिंब, वड, चिंच, आंबा, पिंपळ, उंबर आदी देशी रोपे लावावीत. या चळवळीत माझा कोणताही राजकीय हेतू नाही. वृक्ष लागवड ही माझी आवडती गोष्ट आहे. संतांच्या आवडीचा हा विषय आहे. त्यामुळे प्रत्येकाने विशेषत: माळकरी व्यक्तींनी संतांच्या नावावर एक तरी रोप लावावे.

श्री. ढगे यांनी आळंदी देवस्थान पालखीतील ४२५ व देहू देवस्थानच्या पालखीतील ३२९ दिंड्या आहेत. प्रत्येक दिंडीतील वारकऱ्यांनी आपल्या गावात हा उपक्रम राबवावा, असे आवाहन केले.