केंद्रीय कृषिमंत्री पाठवणार डाळिंब पाहणीसाठी पथक

सोलापूर ः राज्यातील डाळिंब क्षेत्र ‘पिन होल बोरर’ या किडीमुळे संकटात आले आहे. त्याला वाचविण्यासाठी केंद्र सरकारने डाळिंब उत्पादक शेतकऱ्यांना तांत्रिक मार्गदर्शनासह नुकसान भरपाईसाठी मदत करावी, अशी मागणी खासदार डॉ. विकास महात्मे आणि मोर्फाचे अध्यक्ष कॄषिभूषण अंकुश पडवळे यांनी केंद्रीय कॄषिमंत्री नरेंद्रसिंह तोमर यांच्याकडे केली. 

महात्मे आणि पडवळे यांनी नुकतीच नवी दिल्ली येथे तोमर यांची भेट घेतली. महाराष्ट्रातील डाळिंब उत्पादक मागील पाच वर्षांपासून तेलकट डाग व अतिवॄष्टीमुळे अडचणीत असताना त्यात भर म्हणून ‘पिन होल बोरर’ या किडीमुळे झाडाची मर मोठ्या प्रमाणावर वाढली आहे. या समस्येमुळे बागा संपत आहेत. त्यामुळे डाळिंब उत्पादक शेतकरी हवालदिल झाला आहे. आतापर्यंत महाराष्ट्रातील ४० हजार हेक्टरहून अधिक क्षेत्र या किडीमुळे संपले आहे. शास्त्रज्ञांनी शिफारस केलेल्या कीटकनाशकांचा वापर करूनही या किडीवर नियत्रंण मिळत नाही, असे पडवळे यांनी तोमर यांच्या निदर्शनास आणून दिले. या वेळी शिष्टमंडळात रविंद्रसिह पाल, नवीशकुमार विग, राहुल खंन्ना, केदारनाथ आंनद आदी उपस्थित होते.

तज्ज्ञांचे पथक पाठवणार तोमर यांनी कॄषिसचिव संजय अग्रवाल यांना एक कॄषी संशोधकांचे केंद्रीय पथक तत्काळ पाहणी करण्यासाठी पाठविण्याच्या सूचना दिल्या. केंद्रीय पथकाच्या पाहणीनंतर शेतकऱ्यांना तांत्रिक मार्गदर्शन करणे व नुकसानीची तीव्रता बघून शेतकऱ्यांना कशी मदत करता येईल, या बाबत विचार केला जाईल, असे आश्‍वासन तोमर यांनी दिले.