परभणीत सोयाबीन पीक खत व्यवस्थापनावर ‘यू ट्यूब लाईव्ह' कार्यक्रम

परभणी : वसंतराव नाईक मराठवाडा कृषी विद्यापीठ आणि रिलायन्स फाऊंडेशनतर्फे ‘सोयाबीन पीक खत व्यवस्थापन' विषयावर ‘यू ट्यूब लाईव्ह' कार्यक्रमाचे आयोजन गुरुवारी (ता.११) करण्यात आले. 

विस्तार शिक्षण संचालक डॉ. डि. बी. देवसरकर, विस्तार कृषी विद्यावेत्ता डॉ. यू. एन. आळसे, सहाय्यक कीटकशास्त्रज्ञ प्रा. डी. डी. पटाईत आदीं सहभागी झाले होते. 

डॉ. देवसरकर म्हणाले, ‘‘सोयाबीन हे जागतिक पातळीवर आधुनिक शेतीमधील महत्वाचे तेलबिया, शेंगवर्गीय पीक आहे. सोयाबीनमध्ये ४० टक्के प्रथिने आणि १९ टक्के तेल असते. एकूण तेल उत्पादनापैकी जवळजवळ ५८ टक्के सोयाबीन तेलाचा वाटा आहे.

एकूण प्रथिनांपैकीं जवळजवळ ६० टक्के प्रथिने सोयाबीनपासून उपलब्ध होतात. अलीकडे सोयाबीन लागवड फार मोठ्या प्रमाणावर वाढत आहे. त्यापासून साधारणपणे ५ दशलक्ष टन इतके उत्पादन मिळते. कमी खर्चात जास्त उत्पादन देणारे नगदी पीक म्हणून सोयाबीनच्या क्षेत्रात झपाट्याने वाढ झाली आहे.’’ 

डॉ. आळसे म्हणाले, ‘‘सोयाबीन पिकास शिफारशीनुसार नत्र, स्फुरद,पालाश अधिक गंधक पेरणीवेळी द्यावे. जमिनीत जस्त या अन्नद्रव्याची कमतरता असल्यास शिफारशीनुसार झिंक सल्फेट पेरणीवेळी द्यावे. उत्पादन वाढीच्या दृष्टीने शिफारशीनुसार बोरॅक्स पेरणीवेळी द्यावे.’’  पटाईत म्हणाले, ‘‘खोडकिडी, पाने खाणाऱ्या अळ्या, हुमणी कीड तसेच रोग व्यवस्थापन, यावर विशेष लक्ष देणे गरजेचे आहे.’’ रिलायन्स फाउंडेशनचे विलास सवाणे, शुभम लाखकर, मनोज काळे, रामाजी राऊत आदींनी पुढाकार घेतला.