खानदेशातील कांदा काढणी हंगाम लांबला

जळगाव ः खानदेशात दरवर्षी खरिपातील कांद्याची काढणी नोव्हेंबरमध्ये सुरू होते. परंतु यंदा अतिपाऊस, उशिराची लागवड यामुळे नवीन कांद्याला हंगाम महिनाभर लांबला आहे. डिसेंबरमध्ये नवा कांदा बाजारात येईल, अशी स्थिती आहे.  सध्या गेल्या उन्हाळ कांद्याची ज्यांनी साठवणूक केली, त्या  कांद्याची बाजारात अधिक आवक आहे. या कांद्याचे दर सध्या प्रतिक्विंटल ३००० रुपये, असे  आहेत. उन्हाळ कांद्याची मे, जूनमध्ये मातीमोल दरात शेतकऱ्यांना विक्री करावी लागली होती. या कांद्याचे दर सप्टेंबरपासून वधारू लागले. दर वधारल्यानंतर निर्यातबंदी व इतर निर्णय झाले. त्याचाही फटका बसला. पण दर स्थिर राहीले. सध्या उन्हाळ कांद्यातील फक्त १० टक्के कांद्याची साठवणूक शेतकऱ्यांकडे आहे. या कांद्याच्या विक्रीतून शेतकरी झालेला तोटा भरून काढू शकतात. परंतु दरवाढ रोखण्यासंबंधी सुरू असलेल्या उपायांबाबत शेतकऱ्यांमध्ये नाराजी आहे.  कांदा दरात सुधारणा नव्हती. तरीदेखील जूनमध्ये खरिपातील कांद्याची तयारी सुरू झाली. परंतु अतिजोरदार पाऊस, अतिपाऊस व इतर समस्यांमुळे खरिपातील कांदा रोपवाटिकांचे धुळ्यातील साक्री, शिरपूर, शिंदखेडा, जळगावमधील चोपडा, धरणगाव, यावल भागात मोठे नुकसान झाले.  नव्याने कांदा रोपवाटिका तयार कराव्या लागल्या. यात पुढे पुनर्लागवडही उशिराने करावी लागली. अनेकांनी ही लागवड ऑक्टोबरच्या सुरवातीला केली. यामुळे कांदा काढणी हंगाम लांबला आहे. डिसेंबरअखेर काढणी सुरू होईल, अशी स्थिती सर्वत्र  आहे.

बाजारात आवक रोडावली बाजारात कांद्याची आवक रोडावली आहे. धुळे, जळगाव, चोपडा, चाळीसगाव येथील बाजार कांद्यासाठी प्रसिद्ध आहेत. या बाजार समित्यांमध्ये मिळून सध्या प्रतिदिन दीड ते दोन हजार क्विंटल कांद्याची आवक होत आहे. गेल्या वर्षी जळगावच्या बाजारात नोव्हेंबरअखेर प्रतिदिन १२०० क्विंटल लाल कांद्याची आवक सुरू होती. यंदा ही आवक लांबली आहे. पुढे आवक वाढली तर दर कमीदेखील होवू शकतात, अशी भीती व्यक्त करण्यात येत आहे.