आत्मनिर्भर योजनेत गुळाचा समावेश; गूळ उद्योजकांना संधी

कोल्हापूर : आत्मनिर्भर भारत पॅकेजअंतर्गत प्रधानमंत्री सूक्ष्म खाद्य उद्योग योजनेत कोल्हापूर जिल्ह्यासाठी ‘गुळा’चा समावेश झाला आहे. जिल्ह्यातील विविध तालुक्‍यांतील सोळा विशेष घटक योजनेतील दोन अशा अठरा जणांना या योजनेचा लाभ मिळविता येईल. ज्या शेतकऱ्यांची गुऱ्हाळे अत्याधुनिक आहेत, किंवा ज्यांना नवीन गूळ उद्योग सुरू करायचा आहे. त्यांना या योजनेचा लाभ घेता येईल, असे कृषी विभागातून सांगण्यात आले. राष्ट्रीय स्तरावरून पहिल्यांदाच गुळासाठी इतक्‍या मोठ्या प्रमाणात वैयक्तिक मदतीची ही योजना सुरू करण्यात आली आहे. विशेष म्हणजे उद्योग उभारणी किंवा विस्तारीकरणासाठी अनुदान मिळण्याबरोबर गुळाचे ब्रॅडिंग करण्यासाठी खर्चाच्या पन्नास टक्के रक्कमही गूळ उत्पादकांना मिळेल हे या योजनेचे वैशिष्ट्य आहे. गूळ तयार करणाऱ्या संस्था किंवा वैयक्तिक शेतकरीही या योजनेसाठी पात्र ठरू शकतील. यामुळे जिल्ह्यातील गुळाच्या बाबतीत नावीन्यपूर्ण प्रयोग करणाऱ्या उत्पादकांसाठी शासनाच्या वतीने अर्थसाह्याची नवी संधी उपलब्ध करण्यात आली आहे. केंद्राने आत्मनिर्भर पॅकेजअंतर्गत प्रधानमंत्री सूक्ष्म खाद्य उद्योग उन्नयन योजनेअंतर्गत जिल्हा स्तरीय समिती स्थापन केली आहे. या समितीने एक जिल्हा एक उत्पादन याची माहिती सादर करण्याच्या सूचना दिल्या होत्या. या अंतर्गत जिल्ह्याचे नेतृत्व करणारा उद्योग सुचविण्याबाबत चर्चा झाली. यामध्ये गूळ उद्योगाचा समावेश करण्यात आला आहे. गूळ हे भौगोलिक मानांकन प्राप्त उत्पादन आहे. याचबरोबर संपूर्ण देशात कोल्हापुरी गूळ प्रसिद्ध आहे. उसाच्या क्षेत्रात जिल्हा आघाडीवर असल्याने जिल्ह्यात गूळ उद्योगाला मोठा वाव आहे. हे लक्षात घेऊन या योजनेसाठी गूळ उद्योगाची निवड करण्यात आली. तालुकानिहाय लक्ष करवीर- ४ (१ विशेष घटक योजना), कागल- २, राधानगरी, गगनबावडा, पन्हाळा, शिरोळ, हातकणंगले, भुदरगड, चंदगड, आजरा (प्रत्येक तालुक्‍यात १), गडहिंग्लज- १ (विशेष घटक योजना) योजनेविषयी...