घरकुल योजनेचा लाभ गरजूंनाच द्या ः टाकसाळे

परभणी ः ‘‘संबंधित कर्मचाऱ्यांनी परिस्थितीचे गांभीर्य लक्षात घेऊन ग्रामीण भागात खरोखर पात्र आणि गरजू लाभार्थी आहेत, त्यांना प्राधान्याने पंतप्रधान घरकुल योजनेचा लाभ द्यावा’’, असे निर्देश जिल्हा परिषदेचे मुख्य कार्यकारी अधिकारी शिवानंद टाकसाळे यांनी दिले.

पंतप्रधान आवास योजना ग्रामीण अंतर्गत आवास प्लस डेटाबेसमधील प्राधान्य क्रम यादी तयार करण्यासाठी जिंतूर तालुक्यातील सर्व ग्रामसेवकांच्या आढावा बैठकीत बुधवारी (ता.१२) ते बोलत होते. या वेळी जिल्हा ग्रामीण विकास यंत्रणेच्या प्रकल्प संचालक रश्मी खांडेकर, पंचायत विभागाचे उपमुख्य कार्यकारी अधिकारी ओमप्रकाश यादव, गट विकास अधिकारी विष्णू मोरे, सहाय्यक गट विकास अधिकारी लोखंडे, डीआरडीएचे सहाय्यक प्रकल्प अधिकारी अंकुश पाठमासे, शाखा अभियंता एस. एस. वसेकर, विस्तार अधिकारी नारायण शिंदे, शिवराम ढोणे आदी उपस्थित होते. 

टाकसाळे म्हणाले, ‘‘ग्रामसेवक आणि संबंधित कर्मचाऱ्यांनी अनावश्यक वेळ न दवडता पुढील दोन दिवसांत घरकुल योजनेतील लाभार्थ्यांच्या पात्र - अपात्र याद्या तपासणी करून पूर्ण कराव्यात.’’ 

मागील वर्षी घरकुल योजनेत जिल्ह्यातील सर्व ग्रामसेवक आणि जिल्हा ग्रामीण विकास यंत्रणेच्या सर्व अधिकाऱ्यांनी उल्लेखनीय कामगिरी बजावल्या बद्दल टाकसाळे यांनी सगळ्यांचे कौतुक केले.

खांडेकर म्हणाल्या, ‘‘ग्रामसेवक, ग्रामविकास अधिकारी तसेच तालुका स्तरावरील विस्तार अधिकारी, गट विकास अधिकाऱ्यांनी केंद्र शासनाच्या मार्गदर्शक सूचनानुसार सर्व ग्रामपंचायतींमधील प्राधान्यक्रम याद्या शासनाच्या निकषानुसार प्राप्त होतील, या बाबत दक्षता घ्यावी.