सातारा जिल्ह्यात आले पीक ४० टक्के घटण्याचा अंदाज

सातारा ः गेल्या तीन वर्षांपासून आले पिकांच्या दरातील घसरण शेतकऱ्यांची डोकेदुखी ठरली आहे. आले पिकास मिळत असलेल्या दर हा न परवडणारा आहे. त्यामुळे या हंगामात आले पिकांच्या क्षेत्रावर परिणाम होणार आहे. ३० ते ४० टक्के आले पिकांचे क्षेत्र कमी होण्याचा अंदाज आहे.

जिल्ह्यात आले पिकांचे सुमारे तीन ते साडे तीन हजार हेक्टर क्षेत्र आहे. सातारा, कोरेगाव, कऱ्हाड, खटाव या तालुक्यात सर्वाधिक आले पीक घेतले जाते. कोरोना येण्यापूर्वी आले पिकांचे दर प्रतिगाडी (५०० किलो) १५ ते २० हजारापर्यंत होते. लॅाकडाऊनमुळे आले. पिकांच्या दरात मोठी घसरण झाली. १५ ते २० हजारांवरून प्रतिगाडीस पाच ते सहा हजार रुपयांवर दर आले आहेत. हेच दर मागील दोन वर्षांपासून मिळत आहे. तरीही दर वाढेल या अपेक्षावर शेतकऱ्यांनी आले पिकांची लागवड केली. याही हंगमात दरात सुधारणा होत नसल्यामुळे आले उत्पादक चिंतेत आहेत. सध्या आले पिकास प्रतिगाडीस पाच ते सहा हजार रुपये दर आहे. 

वातावरणातील सतत होत असलेल्या बदलांमुळे आले पिकांस कंदकुज झाल्याने भांडवली खर्चात मोठी वाढ झाली आहे. आले लागवड करण्याकडे कल कमी होऊ लागला आहे. बियाणे खरेदीबाबत शेतकऱ्यांमध्ये फारशी उत्सुकता दिसून येत नाही. परिणामी, या हंगामात मोठ्या प्रमाणात आले पिकांच्या क्षेत्रात घट होणार आहे. 

सोयाबीन सारखे तिमाही पिकांचे जेवढे पैसे शिल्लक राहतात, तेवढे वर्षभर आले करून पैसे राहात नसल्याचे शेतकरी सांगत आहेत. तज्ज्ञ शेतकऱ्यांच्या मते आले पिकांच्या क्षेत्रात ३० ते ४० टक्के घट होण्याचा अंदाज आहे. आले पिकाचा पीक विमा योजनेत समावेश करण्याची मागणी शेतकऱ्यांकडून केली जात आहे.