आबासाहेब वीर यांच्या नावाचा पुरस्कार नम्रतेने स्वीकारतो : गणपतराव देशमुख

सोलापूर/सातारा  :  ‘क्रांतिवीर किसन वीर यांच्या स्वातंत्रपूर्व आणि स्वातंत्रोत्तर काळातील योगदानाची जाणीव मनात सदैव आहे. आबासाहेब वीर यांच्या नावाने पुरस्कार असल्याने तो आपण नम्रतेने स्वीकारत असून, जनतेला अर्पण करीत आहे,’ अशी भावना ज्येष्ठ नेते गणपतराव देशमुख यांनी व्यक्त केली. 

किसन वीर सातारा सहकारी साखर कारखान्याच्या वतीने देशभक्त आबासाहेब वीर सामाजिक पुरस्कार करोनाच्या पार्श्‍वभूमीवर सांगोला येथे शेतकरी सहकारी सूतगिरणीच्या कार्यस्थळावर ‘किसनवीर’चे अध्यक्ष मदन भोसले यांच्या हस्ते नुकताच प्रदान करण्यात आला.

श्री. देशमुख म्हणाले, ‘‘महाराष्ट्राच्या प्रगतीच्या चळवळीत किसन वीर यांचे मोलाचे योगदान आहे. स्वातंत्र प्राप्तीसाठी झगडलेल्या किसन वीर यांनी येरवड्याचा तुरुंग फोडला. त्या वेळी त्यांना पकडण्यासाठी ब्रिटिश सरकारने मोठे बक्षीस ठेवले; पण ते अखेरपर्यंत त्यांच्या हाती लागले नाहीत. स्वातंत्र्यप्राप्तीनंतर सहकार, शिक्षण, राजकारण या क्षेत्रात त्यांनी भरीव योगदान दिले.’’

श्री. भोसले म्हणाले, ‘‘एका आबासाहेबांच्या नावाचा पुरस्कार दुसऱ्या आबासाहेबांना देताना मनस्वी आनंद होत आहे. पुलोद सरकारमध्ये भाई गणपतराव देशमुख आणि प्रतापराव भोसले यांनी एकत्र काम केले.’’ या वेळी गणपतराव देशमुख यांच्या पत्नी रतनताई देशमुख यांचा सत्कार करण्यात आला.  कार्यक्रमास सूतगिरणीचे अध्यक्ष नानासाहेब लिंगाडे, सांगोल्याच्या सभापती राणीताई कोलवले, सोलापूर जिल्हा परिषदेच्या समाजकल्याण सभापती संगीता दांडोरे, सांगोले खरेदी- विक्री संघाचे अध्यक्ष पी. डी. जाधव, कृषी उत्पन्न बाजार समितीचे सभापती गिरीश गंगाधडे आदी मान्यवर उपस्थित होते.  सन्मानपत्राचे वाचन एन. एम. काळोखे यांनी केले. मानपत्राचे लेखन राहुल तांबोळी यांनी केले. ॲड. प्रतापसिंह देशमुख यांनी प्रास्ताविक केले. नंदकुमार निकम यांनी सूत्रसंचालन केले. बाळासाहेब काटकर यांनी आभार मानले.