चंद्रपुरात उच्चांकी ४३.८ अंश तापमान

पुणे : एप्रिल महिना सुरू झाल्याने विदर्भातील कमाल तापमानात चांगलीच वाढ होऊ लागली आहे. येत्या काळात उन्हाचा चटका आणखी वाढणार आहे. त्यामुळे कमाल तापमानात आखणी वाढ होईल. शुक्रवारी (ता. २) सकाळी चोवीस तासांत चंद्रपूर येथे देशातील उच्चांकी ४३.८ अंश सेल्सिअस तापमानाची नोंद झाली असल्याचे हवामान विभागाच्या सूत्रांनी सांगितले.  

सध्या राज्यात हवामान कोरडे आहे. त्यामुळे उन्हाचा चटका वाढू लागला आहे. मध्य महाराष्ट्र आणि विदर्भात कमाल तापमानात चांगलीच वाढ झाली आहे. विदर्भात गोंदिया, बुलडाणा वगळता सर्वच भागात कमाल तापमान चाळीस अंश सेल्सिअसवर गेले आहे. मराठवाड्यातही उन्हाच्या झळा तीव्र होत आहे.

औरंगाबाद भागात तापमानात काहीशी घट असली तरी उर्वरित भागात कमाल तापमान चाळीस पेक्षा अधिक आहे. मध्य महाराष्ट्रात उन्हाचा चटका कमीअधिक स्वरूपात आहे. सोलापूरमध्ये ४०.२ अंश सेल्सिअस एवढे कमाल तापमान नोंदविले गेले असून इतर पुणे, नगर, नाशिक, कोल्हापूर, जळगाव भागात कमाल तापमान ३१ ते ३८ दरम्यान होते.

कोकणातही उन्हाचा काहीसा कमी असल्याने कमाल तापमान ३० ते ३४ अंश सेल्सिअसच्या दरम्यान होते. राज्यात कमाल तापमानासह किमान तापमानातही वाढ होत आहे. उच्चांकी तापमान नोंदविलेल्या चंद्रपूर येथील कमाल तापमानात सरासरीच्या तुलनेत तीन अंश सेल्सिअसची नोंद झाली आहे. तर, किमान तापमानात सरासरीच्या तुलनेत उणे १.३ अंश घट होऊन पुणे येथे १६.६ अंश सेल्सिअसचे सर्वात कमी तापमान नोंदविले गेले.