संतुलित खत व्यवस्थापन आवश्‍यक : पवार

सोलापूर : ‘‘रोजच्या आहाराबाबत सध्या लोकांमध्ये सजगता, जागरुकता आली आहे. सेंद्रिय शेतीच्या शेतमालाला उठाव मिळतो आहे. त्यामुळे शेतकऱ्यांनी आपल्या पिकासाठी खतांचा संतुलित वापर करणे गरजेचे आहे,’’ असे मत महापालिकेचे उपायुक्त अजयसिंह पवार यांनी केले. 

सोलापुरातील कृषी विज्ञान केंद्रात खत वापर जागृती कार्यक्रमामध्ये ते बोलत होते. केंद्र सरकारच्या शेतकरी कल्याण व कृषी मंत्रालय तसेच खत मंत्रालयाच्या मार्गदर्शनानुसार हा कार्यक्रम झाला. केंद्रीय कृषिमंत्री नरेंद्रसिंह तोमर यांनी शेतकऱ्यांना उद्देशून केलेल्या भाषणाचे थेट प्रक्षेपण दाखविण्यात आले. यामध्ये केंद्रीय खते व रसायनमंत्री सदानंद गौडा, केंद्रीय राज्यमंत्री कृषी सहकार व शेतकरी कल्याण पुरुषोत्तम रुपाला यांचा समावेश होता. शबरी कृषी प्रतिष्ठान सोलापूरचे अध्यक्ष प्रदीप गायकवाड अध्यक्षस्थानी होते. रब्बी ज्वारी संशोधन केंद्राचे डॉ. के. के. शर्मा, राष्ट्रीय डाळिंब संशोधन केंद्र सोलापूरचे शास्त्रज्ञ आशिष मैती, राष्ट्रीय कृषी संशोधन प्रकल्प सोलापूरचे मृदा सूक्ष्म जीवशास्त्रज्ञ डॉ. डी. व्ही. इंडी, कृषी उपसंचालक रवींद्र माने, आत्माचे उपसंचालक मदन मुकणे, कृषी विज्ञान केंद्र सोलापूरचे वरिष्ठ शास्त्रज्ञ डॉ. ला. रा. तांबडे उपस्थित होते. 

पवार म्हणाले, ‘‘शेतकऱ्याच्या प्रगतीवर, कामावरच देशाची प्रगती अवलंबून आहे. त्यामुळे योग्य त्या पद्धतीने नियोजनाने शेती करणे गरजेचे आहे.’’गायकवाड म्हणाले, ‘‘शेतकऱ्यांनी स्वतःच्या उत्पादनात वाढ करण्यासाठी शेणखताचा जास्तीत जास्त वापर करावा. हिरवळीच्या खतांचा वापर वाढवावा. त्यांनी जैविक खते खात्रीच्या संस्थांकडूनच खरेदी करावी.’’

केंद्राचे मृदा शास्त्रज्ञ डॉ. आशिष मैती म्हणाले, ‘‘जैविक खतांचा वापर करणे आवश्‍यक आहे. जमिनीचा पीएच कमी करण्यासाठी जिप्समचा वापर वाढविणे गरजेचे आहे.’’ या वेळी अमोल शास्त्री, डॉ. तांबडे यांनीही मनोगत व्यक्त केले. व्ही. बी. भिसे यांनी सूत्रसंचालन केले. प्रदीप गोंजारी यांनी आभार मानले.