उजनीत सापडला दुर्मीळ आहेर मासा

इंदापूर, जि. पुणे ः तालुक्‍यातील उजनी धरण पाणलोट क्षेत्रात मासेमारी व्यवसाय करणाऱ्या बाभूळगाव येथील बाबा मोरे, अमित कावरे, बापू माने यांच्या जाळ्यात दुर्मीळ तसेच औषधी गुणधर्म असणारा साडेसहा किलो वजनाचा 'आहेर' जातीचा मासा सापडला. या माशास इंदापूर मासळी बाजारात प्रतिकिलो दोन हजार रुपयेप्रमाणे तेरा हजार रुपये असा उच्चांकी भाव मिळाल्याची माहिती इंदापूर कृषी उत्पन्न बाजार समितीचे सभापती अप्पासाहेब जगदाळे यांनी दिली. उजनी जलाशयात वेगवेगळ्या जातींचे ३० प्रकारचे मासे आढळतात. मात्र, जलाशयात मत्स्यबीज सोडण्यात हेळसांड झाल्याने व चिलापी माशाच्या आक्रमणामुळे कटला, मरळ, रहू, शिंगाडा, चांभारी, वाम हे पूर्वी मुबलक प्रमाणात मिळणारे मासे सध्या कमी प्रमाणात मिळत आहेत. पुणे जिल्ह्यात सर्वांत मोठा मासेमारीचा व्यवसाय उजनी धरण व पाणलोट क्षेत्रात चालतो. धरणातील मासे परदेशांतही पाठविले जातात. या धरणात चिलापी व चांभारी जातीचे मासे मुबलक प्रमाणात मिळतात. इंदापूर मासळी बाजारात चिलापी जातीच्या माशाला मोठी मागणी आहे. उजनी धरणातील गोड्या पाण्यातील माशांना मुंबई, हैदराबाद, कोलकता येथील बाजारपेठेत चांगली मागणी आहे.