बार्शी बाजार समितीला १० कोटींचे उत्पन्न

सोलापूर ः ‘‘बार्शी कृषी उत्पन्न बाजार समितीस सन २०२०- २१ या आर्थिक वर्षात १० कोटी रुपयांचे उत्पन्न मिळाले,’’ अशी माहिती बाजार समितीचे सभापती रणवीर राऊत यांनी दिली. 

राऊत म्हणाले, ‘‘बाजार समितीने कामासाठी प्राधान्यक्रम ठरवला. त्यातून प्रथम बाजार समितीतील अंतर्गत रस्ते, गटारी, वृक्षारोपण, दिवाबत्ती आदी मूलभूत सोयीसुविधांवर भर देऊन बाजार समितीच्या कामकाजात सुधारणा केल्या. त्याशिवाय शेतकऱ्यांच्या मालाचे चोख वजन, रोख पट्टी यामुळे मराठवाडा व जिल्ह्यातील शेतीमालाची आवक मोठ्या प्रमाणामध्ये होत आहे. व्यापार करणाऱ्या व्यापाऱ्यांची स्पर्धा निर्माण होऊन व्यापारामध्ये वाढ झाली आहे.

पर्यायाने शेतकऱ्यांच्या शेतमालाला योग्य भाव मिळत आहे.’’  ‘‘२०२० - २१ या आर्थिक वर्षात मार्केट शुल्क अर्थात सेसच्या स्वरूपात ८ कोटी ८६ लाख ९७ हजार ३४७ रुपये, तर इतर १ कोटी १८ लाख २९ हजार २०६ असे एकूण १० कोटी ५ लाख २६ हजार ५५३ इतके उत्पन्न मिळाले. तर एकूण खर्च ५ कोटी ४४ लाख ५१ हजार ३७० रुपये इतका झाला. मागच्या वर्षात ४ कोटी ६० लाख ७५ हजार १८२ रुपये इतका वाढावा आहे,’’ असे राऊत यांनी सांगितले.

जनावरांसाठी शेड, शीतगृहे उभारणार

‘‘लातूर रस्त्यावर बाजार समितीच्या जागेत एक हजार टन क्षमतेचे दोन शीतगृह बांधकाम करणे, उपबाजार वैराग येथे एक हजार टन क्षमतेचे एक शीतगृह बांधकाम करणे, वैराग येथे जनावरांसाठी १५ निवारा शेड बांधणे, ही विकासकामे नियोजित आहेत,’’ असे राऊत यांनी सांगितले. 

सौरऊर्जा प्रकल्प उभारणार

‘‘बाजार समितीत लवकरच सौर ऊर्जा निर्मिती प्रकल्प सुरू करत आहोत. त्यामुळे विजेच्या बाबतीमध्ये बाजार समिती पूर्णपणे स्वावलंबी होणार आहे. समितीच्या वीज बिलात  दरमहा लाखो रुपयांची बचत होणार आहे. त्यामुळे बाजार समितीच्या उत्पन्नात वाढ होईल,’’ असेही राऊत म्हणाले.