Urad Market : खानदेशात उडीद आवक सुरू

Jalgaon News : खानदेशात बाजार समित्या किंवा बाजारात नव्या हंगामातील उडदाची आवक सुरू झाली असून, दर प्रतिक्विंटल ८३०० ते ९२०० रुपये प्रतिक्विंटल व सरासरी ८८०० रुपये असा मिळत आहे.

आवक मागील चार ते पाच दिवसांतच सुरू झाली आहे. अनेक शेतकऱ्यांनी पावसापूर्वी उडदाची कापणी केली. त्या वेळेस पाऊस नसल्याने त्याची मळणीदेखील झाली. हा उडीद बाजारात येत आहे.

खानदेशात जळगावमधील जळगाव, चोपडा, अमळनेर, धुळ्यातील शिरपूर, दोंडाईचा (ता. शिंदखेडा), नंदुरबारमधील नंदुरबार व शहादा या बाजार समित्यांत उडदाची आवक सुरू झाली आहे. चोपडा येथील बाजार समितीत मागील चार दिवसांत प्रतिदिन सरासरी ५५ क्विंटल उडदाची आवक झाली आहे. दर प्रतिक्विंटल ८३०० ते ९२०० रुपये प्रतिक्विंटल, असा मिळाला.

जळगाव येथील बाजार समितीतही कमाल दर ९२०० रुपयांपेक्षा अधिक नसल्याची माहिती मिळाली. जळगाव जिल्ह्यात रोज प्रमुख बाजार समित्यांत २५० क्विंटल उडदाची आवक होत आहे. उडदाचा दर्जा बऱ्यापैकी आहे. कारण अतिपावसाचा फटका पिकाला बसलेला नाही. काळ्या कसदार जमिनीत कमी पावसातही पिकाची स्थिती बरी होती.

तापी, गिरणा, पांझरा, अनेर नदीच्या क्षेत्रात उडदाची पेरणी बऱ्यापैकी झाली होती. याच भागातून आवक होत आहे. धुळ्यात आवक कमी आहे. नंदुरबार जिल्ह्यातही आवक कमी आहे. कारण नंदुरबारात कमी पावसात नंदुरबार, नवापूर भागात उडदाचे नुकसान झाले. जूनमध्ये पाऊस नसल्याने अनेकांनी उडीद पेरणी टाळली.

यामुळे या भागात आवक कमी आहे. जळगाव जिल्ह्यात अमळनेर, चोपडा व जळगाव बाजार समित्यांच्या क्षेत्रात पेरणी अधिक झाली होती. याच भागात आवकही सुरू झाली आहे. मागील आठवड्यात पाऊस झाल्याने अनेकांची उडीद कापणी, मळणी रखडली आहे. यामुळे आवक पुढील काही दिवस स्थिर राहील. परंतु वातावरण कोरडे, सूर्यप्रकाशित राहिल्यास आवक पुढील आठवड्यात वाढेल, असाही अंदाज आहे.