Turmeric Rate: बाजारपेठेत हळदीची मागणी वाढली, दर स्थिर राहण्याचा अंदाज

Sangli News: सांगली आणि सातारा जिल्ह्यांत सध्या हळद काढणीला गती आली आहे. त्यामुळे बाजार समितीत हळदीची आवक हळूहळू वाढू लागली आहे. गेल्या पंधरा दिवसांपासून हळदीचे दर टिकून आहेत. हंगामाच्या प्रारंभापासून हळदीला चांगले दर मिळत असल्याने हळद उत्पादक शेतकऱ्यांना मोठा दिसाला मिळाला आहे. येत्या पंधरा दिवसांत हळदीची आवक वाढणार असून हळदीचे दर स्थिर राहतील, असा अंदाज हळद उद्योगातील जाणकारांनी व्यक्त केला आहे.

यंदाच्या हंगामातील हळद विक्री सुरू होऊन पंधरा दिवसांचा कालावधी पूर्ण झाला आहे. बाजार समितीत हळदीची मागणीही वाढू लागली असल्याने आवकही वाढू लागली आहे. हळदीला चांगले दर मिळत असल्याने विक्रीसाठी पुढे येत असल्याचे चित्र आहे. नवीन हळदीचे सौदे सुरू झाल्यानंतर सात दिवसांनंतर हळदीच्या दरात प्रति क्विंटलला ३०० रुपयांची वाढ झाली होती. गेल्या आठवड्यापासून हळदीचे दर टिकून आहेत.

दरम्यान, सांगली, सातारा जिल्ह्यांतील हळदीची काढणीला गती आली आहे. बाजारपेठेतील दराची स्थिती पाहूनच शेतकरी हळद विक्रीसाठीचे नियोजन करत आहे. राज्यातील विदर्भ, मराठवाड्यासह तेलंगणा, कर्नाटक, तमिळनाडू, मध्य प्रदेश, आंध्र प्रदेश या राज्यातील हळद काढणीचे नियोजन शेतकरी करु लागला आहे. या महिन्याच्या अखेरीपासून परपेठ (परराज्य) हळदीची आवक सुरू होण्याची शक्यता आहे.

बाजार समितीतील हळद आवक व विक्री (पोती)

तारीख.... आवक... विक्री...

१० फेब्रुवारी .....४८६३...१८४०

११ फेब्रुवारी...२४४६...१०६५

१३ फेब्रुवारी...५२३०...५६१

१४ फेब्रुवारी...३३७१....११८५

१७ फेब्रुवारी....७१३३....६०७

१८ फेब्रुवारी...८४०२....३१७

प्रतवारीनुसार हळदीचे दर (प्रति क्विंटलमध्ये)

कणी : १३००० ते १३५००

पावडर क्वालिटी : १३८०० ते १४२००

मध्यम : १५००० ते १५५००

लगडी : १८५०० ते २००००