Banana Market : केळीच्या आवकेत किंचित वाढ

Jalgaon News : खानदेशात केळीच्या आवकेत मागील चार ते पाच दिवसांत किंचित वाढ झाली आहे. परंतु दरही २५०० रुपये प्रतिक्विंटलपर्यंत स्थिर आहेत. केळी निर्यातीतही मागील सहा ते सात दिवसांत वाढ झाली आहे.

केळीला सणासुदीमुळे मागणी आहे. केळीचे आगार असलेल्या रावेर भागात केळीची आवक घटली आहे. या भागात सध्या फक्त ६० ते ६५ ट्रक (एक ट्रक १६ टन क्षमता) केळीची आवक होत आहे. तर जळगाव जिल्ह्यात अन्य भागात मिळून रोज १०० ते ११० ट्रक केळीची आवक होत आहे. धुळ्यातही रोज तीन - चार ट्रक केळीची आवक आहे.

तर नंदुरबारातही रोज पाच ते सहा ट्रक केळीची आवक होत आहे. खानदेशात सध्या रोज १७० ते १८० ट्रक केळीची आवक होत आहे. आवक आठ ते १० ट्रकने वाढली आहे. आवकेत मोठी वाढ नाही. परंतु केळीची मागणी उत्तरेसह राज्यातील बाजारात उठाव आहे. दर्जेदार किंवा काश्मीर, आखातात पाठवणुकीच्या केळीला प्रतिक्विंटल कमाल २५०० रुपये दर शिवार किंवा खेट खरेदीत मिळत आहे.

मध्य प्रदेशात केळीची आवक बऱ्यापैकी आहे. तेथेही केळी दरात सतत वाढ झाली आहे. बऱ्हाणपूर येथील बाजारात केळीला जाहीर लिलावात रविवारी (ता. १८) कमाल २६०० रुपये प्रतिक्विंटलचा दर मिळाला. तर किमान दर तेथेही १६०० ते १७०० रुपये प्रतिक्विंटल असा आहे.

कमी दर्जाची केळी फारशी खानदेशात उपलब्ध नाही. यामुळे सध्या केळी दर २००० ते २५०० रुपये प्रतिक्विंटल, असे आहेत. आखातातही केळीची पाठवणूक गतीने सुरू आहे. खानदेशात सध्या रोज नऊ कंटेनर केळीची आखातात पाठवणूक सुरू आहे. निर्यातक्षम केळीची मागणी मोठी आहे. परंतु हवी तेवढी केळी निर्यातीसाठी उपलब्ध होत नसल्याची स्थिती आहे.