Betel Leaf Price : खाऊच्या पानांचे दर टिकून

Sangli News : मार्गशीर्ष महिन्यातील पूजेसाठी राज्यातील विविध पानांच्या पेठांत खाऊच्या पानांची मागणी वाढली असून, काहीसा उठावही होत आहे. त्यामुळे गेल्या आठवड्यापासून पानांच्या प्रति डागासाठी ५०० ते ७०० रुपयांची वाढ झाली आहे. हे दर येत्या महिनाभर दर टिकून राहतील, असा अंदाज पान उत्पादक शेतकरी, व्यापाऱ्यांनी व्यक्त केला आहे.

दसरा, दिवाळीच्या दरम्यान, पानांच्या बाजारपेठेत पानांची आवक कमी असून, उठावही चांगला झाला होता. त्यामुळे खाऊच्या पानांच्या दरात वाढ झाली होती. या काळात १५०० ते ५ हजार रुपये प्रति डाग असा दर होता. सुमारे पंधरा दिवस पानांचे दर टिकून राहिले होते. त्यामुळे पान उत्पादक शेतकऱ्यांना या दरवाढीचा दिलासा मिळाला होता. या काळात पानांच्या पेठात खाऊच्या पानांची आवक कमी असल्याने दर टिकून राहतील, असा अंदाज शेतकऱ्यांनी व्यक्त केला होता.

मात्र नोव्हेंबरच्या मध्यापासून गेल्या पंधरा दिवसांपासून मुंबई, पुणे, नाशिक, रत्नागिरी, लातूर, पंढरपूर यांसह गुजरात, कर्नाटकातील पानांच्या पेठांमध्ये पानांची आवक कमी-अधिक होत आहे. त्यामुळे या काळात पुन्हा पानांच्या दरात घसरण झाली होती. या पंधरा दिवसांत पानांना प्रति डागास १५०० ते ३००० रुपये असा दर होता. परिणामी, पानांच्या दरातील घसरणीमुळे उत्पादकांत धास्ती निर्माण झाली होती.

मार्गशीर्ष महिन्यात पूजेसाठी पानांची मागणी वाढली असून उठावही होऊ लागला आहे. त्यामुळे गेल्या आठवड्यापासून पानांच्या दरात वाढ झाली आहे. मंगळवार, बुधवार आणि गुरुवार या दिवशी पानांना मोठी मागणी असते. त्यामुळे शुक्रवार, शनिवार, रविवार आणि सोमवार या चार दिवसांत पानांच्या काढणीचे नियोजन शेतकरी करतात. सध्या पानांच्या प्रति डागासाठी ५०० ते ७०० रुपयांनी वाढ झाली आहे.

पानांचे दर (एका डागात १२ हजार पाने)

कळी १२०० ते ३५००

फाफडा १६०० ते ४५००

हक्कल १२०० ते १४००