Pomegranate Price: डाळिंबाला प्रति किलोस १०० ते १७५ रुपये दर

Sangli News: बाजारपेठेत डाळिंबाची आवक आणि मागणी चांगली असल्याने हस्त बहारातील डाळिंबाचे दर टिकून आहेत. मात्र, वाढत्या उष्णतेचा फटका डाळिंबावर बसू लागला असल्याने शेतकऱ्यांच्या अडचणीत वाढ होण्याची शक्यता आहे. एप्रिलच्या मध्यापर्यंत डाळिंबाचे दर टिकून राहण्याचा अंदाज डाळिंब उद्योगातील जाणकारांनी व्यक्त केला आहे. सध्या डाळिंबाला प्रति किलोस १०० ते १७५ रुपये असा दर मिळत आहे.

यंदा राज्यात ३० हजार हेक्टरवर डाळिंबाचा बहार शेतकऱ्यांनी धरला असल्याचे डाळिंब उत्पादक शेतकऱ्यांनी सांगितले. प्रतिकूल परिस्थितीतही शेतकऱ्यांनी डाळिंबाच्या बागा साधल्या आहेत. मार्चच्या पहिल्या आठवड्यात आगाप हस्त बहारातील डाळिंबाची विक्री सुरू झाली. बाजारात डाळिंबाची मागणी असूनही उठावही चांगला होत आहे. त्यामुळे डाळिंबाला चांगले दर मिळत आहेत.

दर्जेदार डाळिंबाला प्रति किलोस १०० ते १७५ रुपये असा दर आहे. सद्यःस्थितीला एकूण क्षेत्रापैकी २५ टक्के म्हणजे ७५०० हेक्टरवरील डाळिंबाची काढणी उरकली आहे. हंगामाला गती आली आहे. दिवसेंदिवस तापमान वाढू लागले आहे. उन्हामुळे डाळिंबाला सनबर्निंगचा प्रादुर्भाव होवू लागला असल्याने डाळिंबाचे दाणे पांढरे होणे अशी समस्या उद्भवण्याची समस्या काही प्रमाणात होवू लागली आहे. त्यामुळे वाढत्या उन्हाचा फटका डाळिंबाला बसू लागला असल्याने शेतकरी हवालदिल झाला आहे. वास्तविक पाहता गेल्या दोन महिन्यांपासून डाळिंबाचे दर टिकून आहेत. त्यामुळे डाळिंब उत्पादक शेतकऱ्यांना दिसाला मिळाला आहे.

गुजरात, राजस्थानमध्ये डाळिंबाला फटका

या दोन्ही राज्यांत हस्त बहार धरला जातो. मात्र, नैसर्गिक आपत्तीचा फटकाही या दोन्ही राज्यांतील डाळिंबाला बसला आहे. त्यामुळे फुलगळ, अपेक्षित फळांची संख्या मिळाली नाही. त्यातच अति उष्णतेचाही फटका बसल्याने या दोन्ही राज्यांतील डाळिंबाची आवक राज्यात आली नाही. त्यामुळे राज्यातील डाळिंबाची उठाव होत असून दर चांगले मिळत आहे.