Papaya Saplings Price: खानदेशात पपई रोपांचे दर आवाक्यात

Jalgaon News: खानदेशात सरत्या हंगामात पपईचे दर स्थिर होते. पपई लागवड यामुळे वाढली. खानदेशात नोव्हेंबर ते फेब्रुवारी या कालावधीत पपईची लागवड अधिकाधिक झाली असून, सध्या लागवड अपवादाने सुरू आहे. परिणामी पपई रोपांचे दरही स्थिरावले आहेत.

मागील हंगामात पपई रोपांचे दर ११ ते १५ रुपये प्रतिरोप, असे होते. त्यात कमाल शेतकऱ्यांनी ७८६ या वाणाच्या लागवडीस पसंती दिली होती. तसेच अनेकांनी १५ नंबर पपई वाणाची लागवडही केली होती. पपईची लागवड २०२४ मध्ये खानदेशात सुमारे साडेसहा हजार हेक्टरवर झाली होती. एकट्या नंदुरबार जिल्ह्यात चार हजार हेक्टरवर पपई होती. त्यात शहादा तालुक्यात साडेतीन हजार हेक्टरवर पपई पीक होते.

धुळे व जळगाव जिल्ह्यात मिळून सुमारे तीन हजार हेक्टरवर पपई पीक होते. धुळ्यातील शिरपूर, धुळे, शिंदखेडा, जळगावातील जामनेर, यावल, रावेर, चोपडा, मुक्ताईनगर या भागात पपई लागवड बऱ्यापैकी झाली होती. परंतु पपईचे दर या हंगामात स्थिर आहेत. दरांचा तिढा फारसा झाला नाही.

अनेकांना पपई पीक परवडले. डिसेंबर व जानेवारीत दर वधारले. डिसेंबरमध्ये सरासरी १२ रुपये प्रतिकिलोचा दर मिळाला. जानेवारीतही सरासरी १५ रुपये प्रतिकिलोचा दर होता. फेब्रुवारी व या महिन्यातही पपईचे कमाल दर १८ रुपये प्रतिकिलो, असे जागेवर शेतकऱ्यांना मिळाले.

यामुळे शेतकऱ्यांनी नव्या हंगामात लागवड वाढविण्याचा धडाका लावला. लागवड नोव्हेंबर २०२४ पासून सुरू झाली. ही लागवड फेब्रुवारीअखेरपर्यंत सुरू होती. नव्या हंगामात (२०२५) खानदेशात पपई लागवड सुमारे साडेसात ते आठ हजार हेक्टरवर राहील, असे दिसत आहे. परंतु अनेकांनी पपई लागवड फेब्रुवारीत उरकली.

सध्या पपई लागवड अपवादानेच सुरू आहे. यामुळे पपई रोपांची मागणी कमी आहे. पपई रोपांचे दर १४ ते १५ रुपये प्रतिरोप, असे आहेत. मध्यंतरी पपई रोपांचे दर १५ ते १७ रुपये प्रतिरोप, असे होते.खानदेशात यंदा पपई रोपांचा पुरवठा अधिक झाला. अनेकांनी धाराशिव, जालना भागातून पपई रोपांचा पुरवठा करून घेतला.

१५ नंबर वाणाची मागणी अधिक

७८६ या वाणाच्या रोपांना अल्प मागणी आहे. कारण त्यात नैसर्गिक समस्यांनी मोठे नुकसान मागील दोन-तीन हंगाम झाले आहे. तुलनेत १५ नंबर पपई वाणाचे उत्पादन बरे आले आहे. यामुळे १५ नंबर पपई वाणाची लागवड विविध भागांत शेतकरी करीत आहेत. त्याची मागणी मागील तीन महिने अधिक होती.