Agrowon Podcast: कलिंगडाला चांगली मागणी; साखर, पपई, कापूस तसेच काय आहेत सोयाबीन भाव

Market Bulletin:

कलिंगडाची आवक वाढली

उन्हाचा चटका वाढत असल्याने कलिंगडालाही मागणी वाढली आहे. दुसरीकडे बाजारातील आवकही वाढत आहे. अनेक भागात कलिंगड प्लाॅट्सची काढणी वेगाने सुरु आहे. हा माल विक्रीसाठी बाजारात येत आहे. याचा दबाव दरावर दिसून आला. कलिंगडाचे भाव क्विंटलमागे २०० ते ३०० रुपयांनी दोन आठवड्यात कमी झाले. सध्या कलिंगडाला प्रतिक्विंटल सरासरी ७०० ते ९०० रुपये भाव मिळत आहे. कलिंगडाची बाजारातील आवक पुढील काही आठवड्यांमध्ये कमी होत जाईल. त्यामुळे दरातही वाढ होईल, असा अंदाज व्यापारी व्यक्त करत आहेत. 

साखरेच्या दरात सुधारणा

देशातील साखर उत्पादनात घट झाली आहे. यंदाच्या हंगामात साखर कारखान्यांचे गाळप लवकर संपत आहे. महाराष्ट्र आणि गुजरातमध्ये कारखाने बंद होण्याचे प्रमाण जास्त आहे. त्यामुळे सर्वच संस्थांनी यंदा देशातील साखर उत्पादनात १९ टक्क्यांपर्यंत घट झाल्याचे अंदाज दिले आहेत. साखरेच्या दरात मागील दोन महिन्यांमध्ये १५ टक्क्यांपर्यंत झाली आहे. तस सध्या बाजारात साखर ४ हजार ते ४ हजार ३०० रुपयाने विकली जात आहे. साखरेच्या दरात आणखी सुधारणा होऊ शकते, असा अंदाज अभ्यासकांनी व्यक्त केला. 

पपईला चांगला उठाव

राज्यातील पपईला सध्या चांगली मागणी आहे. त्यामुळे पपईच्या भावातील तेजी टिकून आहे. पपईचे वाढलेले भाव मागील काही दिवसांपासून स्थिर आहेत. वाढती उष्णता आणि रमजान सणामुळे पपईला चांगला उठाव आहे. राज्यातील पपई सध्या देशभरात जात आहे. त्यामुळे पपईला सध्या १७०० ते २ हजार रुपयांचा भाव मिळत आहे. यंदा पपईची लागवड सरासरीपेक्षा कमीच होती. त्यामुळे आवकही मर्यादीत आहे. पपईचा बाजारभाव आणखी काही आठवडे कायम राहू शकतो,  असा अंदाज पपई बाजारातील अभ्यासकांनी व्यक्त केला.    

सोयाबीन दबावातच

देशातील बाजारात सोयाबीनवरील दबाव कायम आहे. सोयाबीनची बाजारातील आवक कमी झाली. मात्र पुरवठा चांगला असल्याने दरावरील दबाव कायम आहे. बाजार समित्यांमध्ये दरात ५० रुपयांपर्यंत चढ उतार दिसत आहेत. देशातील प्रक्रिया प्लांट्सनी सोयाबीन खेरदीचे भाव ४ हजार २०० ते ४ हजार ३५० रुपयांच्या दरम्यान काढले होते. मात्र सोयाबीनला बाजारात सरासरी ४ हजारांच्या दरम्यान भाव मिळाला. सोयाबीनची देशात उपलब्धता चांगली आहे. आंतरराष्ट्रीय बाजारातही दबाव आहे. त्यामुळे सोयाबीनचे भाव देशातही दबावातच राहतील, असा अंदाज सोयाबीन बाजारातील अभ्यासकांनी व्यक्त केला.

कापसाचे दर टिकून

आंतरराष्ट्रीय बाजारात कापसाच्या दरावरील दबाव कायम आहे. कापूस दर सातत्याने ६५ सेंट प्रतिपाऊंडच्या दरम्यान दिसत आहेत. या पातळीपेक्षा दर कमी किंवा जास्त झाले तरी पुन्हा ही पातळी गाठत आहे. त्यामुळे दरावरील दबाव कायम आहे. देशातील बाजारात कापसाची आवक कमी होत आहे. त्यामुळे दरही टिकून आहेत. आजही बाजारात कापसाला सरासरी प्रतिक्विंटल ७ हजार १०० ते ७ हजार ४०० रुपयांच्या दरम्यान भाव मिळाला. पुढील आठवड्यापासून कापसाची आवक आणखी कमी होईल. त्यामुळे दरालाही आधार मिळेल, अशी शक्यता कापूस बाजारातील अभ्यासकांनी व्यक्त केली.