Papaya Cultivation : खानदेशात पपई लागवडीत वाढ

Jalgaon News : खानदेशात यंदा पपई लागवडीत मोठी वाढ दिसत आहे. लागवड सुरूच असून, यंदाचे क्षेत्र आठ ते साडेआठ हजार हेक्टरवर पोचेल, असा अंदाज आहे. पपईची लागवड मागील हंगामात सात हजार हेक्टरवर झाली होती. एकट्या नंदुरबार जिल्ह्यातील लागवड ५००० हेक्टरवर होती.

तर शहादा (जि. नंदुरबार) तालुक्यातील कापूस लागवड साडेतीन हजार हेक्टरवर झाली होती. जळगाव व नंदुरबारात मिळून सुमारे २१०० हेक्टरवर पपई पीक होते. परंतु यंदा जळगाव, धुळे जिल्ह्यात पपईची लागवड वाढली आहे.

जळगावात यंदा सुमारे दोन हजार हेक्टरवर पपईची लागवड झाल्याचा अंदाज आहे. तर धुळ्यात सुमारे १२०० हेक्टरवर पपई पीक आहे. तर नंदुरबारात सुमारे ५३०० ते ५००० ते ५१०० हेक्टरवर पपईची लागवड होईल, असा अंदाज आहे. नंदुरबारात लागवड या महिन्यात सुरू झाली आहे. जळगाव, धुळ्यातील लागवड पूर्ण होत आली आहे.

लागवडीसाठी १५ नंबर, ७८६, २१ नंबर आदी वाणांना प्राधान्य शेतकऱ्यांनी दिले आहे. काही शेतकऱ्यांनी सुधारित व संशोधित पपई वाणांची लागवड केली आहे. नंदुरबारात पपईखालील क्षेत्र अत्यल्प किंवा किंचित कमी होईल.

परंतु लागवड जळगावात अधिक आहे. जळगावात यंदा चोपडा, जामनेर, यावल, रावेर, जळगाव या भागात पपईची लागवड वाढली आहे. धुळ्यात धुळे, शिंदखेडा व शिरपूर भागात पपई पीक आहे. धुळ्यातील लागवडीत किंचित वाढ झाली आहे.

उष्णतेचा फटका

अनेकांनी कापूस लागवड टाळून पपईला पसंती दिली आहे. लागवड मे अखेरपर्यंत सुरू राहील. उष्णता अधिक असल्याने अनेक शेतकरी पपईला क्रॉप कव्हर लावत आहेत. यामुळे पपईचे उष्णतेपासून संरक्षण होत आहे.