Papaya Market : पपई दरात सुधारणा

Jalgaon News : खानदेशात पपईच्या दरातील सुधारणा सुरूच आहे. दर थेट किंवा शिवार खरेदीत शेतकऱ्यांना साडेनऊ रुपये प्रतिकिलो मिळत आहेत. दरातील पडझड मागील आठवड्यातच थांबली होती. यानंतर दरात सतत सुधारणा झाल्याने शेतकऱ्यांना दिलासा मिळाला आहे.

पपईची आवकही अल्प आहे. कारण खानदेशात सर्वाधिक साडेपाच हजार हेक्टरवर पपई लागवड करणाऱ्या नंदुरबार जिल्ह्यात रोगराई व मध्यंतरी घसरलेल्या दरामुळे पपईचे पीक शेतकऱ्यांनी काढले. पपईखालील मोठे क्षेत्र डिसेंबर व जानेवारीत रिकामे झाले. डिसेंबर, जानेवारीत पपईची मागणी नव्हती.

या दोन्ही महिन्यांत पपईला सरासरी कमी दर मिळाला. डिसेंबरमध्ये शेतकऱ्यांना जागेवर सरासरी तीन रुपये प्रतिकिलोचा दर मिळाला. तर जानेवारीच्या पहिल्या पंधरवड्यात सरासरी अडीच रुपये प्रतिकिलोचा दर मिळाला आणि दुसऱ्या पंधरवड्यात सरासरी साडेतीन रुपये प्रतिकिलोचा दर मिळाला. जानेवारीच्या अखेरीस दरातील पडझड थांबली. या महिन्याच्या सुरवातीला दरात सुधारणा सुरू झाली.

मागील काही दिवसांत पपई दरात एक किलोमागे रोज २५ पैसे ते ५० पैसे सुधारणा झाली. जानेवारीच्या अखेरीस पपई दर पाच रुपये प्रतिकिलो होते. सध्या साडेनऊ रुपये प्रतिकिलोचा दर आहे.

सध्या आवक प्रतिदिन २५ ट्रक (एक ट्रक १६ टन क्षमता) एवढी होत आहे. आवक नंदुरबारमधील काही भागात तसेच धुळ्यातील शिरपूर, जळगाव जिल्ह्यातील चोपडा, यावल व जामनेर भागात होत आहे. कमी दर्जाच्या पपईचे दर साडेसात रुपये प्रतिकिलो आहेत. सध्या दर्जेदार पपई सर्वत्र उपलब्ध आहे.

उत्तर भारतात पाठवणूक

पपई दरात तब्बल अडीच महिन्यानंतर चांगली दरवाढ झाली आहे. पाठवणूक पंजाब, दिल्ली, उत्तर प्रदेश, हरियाना, राजस्थान येथे करण्यात येत आहे. नंदुरबारमधील शहादा, धुळ्यातील शिरपूर, मध्य प्रदेशातील बऱ्हाणपूर येथील एजंट पपईची पाठवणूक अन्य राज्यांत करीत आहेत. पपईची आवक खानदेशात पुढेही कमीच राहील, असे सांगितले जात आहे.