Papaya Rate : पपईदर परवडेना; किलोला तीन ते पाच रुपये

Jalgaon News : खानदेशात पपईची आवक वाढत असतानाच दरही सतत कमी झाले आहेत. सध्या तीन ते पाच रुपये प्रतिकिलोचा दर जागेवर किंवा शिवार खरेदीत शेतकऱ्यांना मिळत आहे. हे दर मात्र परवडत नसल्याचा मुद्दा शेतकरी उपस्थित करीत आहेत.

पपई दरांचा तिढा मागील ४५ ते ५० दिवसांत तीन वेळेस तयार झाला आहे. दिवाळीपूर्वी पपईदर जागेवर ३० ते ३५ रुपये प्रतिकिलो, असा मिळाला होता. परंतु मागील ४५ ते ५० दिवसांत पपईच्या दरात सतत घट झाली आहे. मध्यंतरी २५ ते ३० रुपये प्रतिकिलोचा दर होता. त्यानंतर दर १८ ते १५ रुपये प्रतिकिलो, असे झाले.

नोव्हेंबरमध्ये पपईला सरासरी २० रुपये प्रतिकिलोचा दर जागेवर शेतकऱ्यांना मिळाला. परंतु या महिन्यात दर १५, १०, नऊ, आठ, पाच व तीन रुपये प्रतिकिलो, असे खाली आले. दरात सतत घसरण झाल्याने शेतकऱ्यांची मोठी वित्तीय हानी या महिन्यात झाली आहे.

पपईदराचा तिढा या आठवड्यातही तयार झाला होता. यात शहादा (जि. नंदुरबार) बाजार समितीने खरेदीदार व शेतकरी आदींची बैठक घेतली व पाच रुपये प्रतिकिलोचा दर जाहीर केला. परंतु खरेदीदार तीन ते चार रुपये प्रतिकिलो या दरात खरेदी करीत आहेत.

तीन ते चार रुपये प्रतिकिलोचा दर शेतकऱ्यांना परवडत नसल्याने नंदुरबार, धुळे जिल्ह्यांत काही शेतकरी पीक मोडून त्यात रब्बी पिके किंवा इतर फळ पिकांची लागवड करण्याचे नियोजन करीत आहेत. खानदेशात पपईची सर्वाधिक ५४०० हेक्टर एवढी लागवड नंदुरबार जिल्ह्यात झाली आहे.

एकट्या शहादा तालुक्यात सुमारे पाच हजार हेक्टरवर पपई पीक आहे. जळगाव जिल्ह्यात सुमारे पावणेदोन हजार हेक्टर आणि धुळ्यातही सुमारे १२०० हेक्टरवर पपई पीक आहे. पपई दरांची तक्रार धुळे व नंदुरबारात अधिक येत आहे. जळगाव जिल्ह्यातही कमी दरांची तक्रार आहे. परंतु बाजार समित्या यासंबंधी ठोस निर्णय घेऊन कारवाई करीत नसल्याचाही मुद्दा आहे.

आवक वाढतीच

खानदेशात सध्या पपईची प्रतिदिन ६० ट्रक (एक ट्रक १६ टन क्षमता) एवढी आवक होत आहे. पपईची पाठवणूक उत्तरेकडे म्हणजेच पंजाब, राजस्थान, दिल्ली, हरियाना आदी भागांत केली जात आहे. तसेच स्थानिक भागातही पपईला उठाव आहे. आवकेत मागील १० दिवसांत सुमारे सात ट्रकने वाढ झाली आहे. जशी आवक वाढत आहे, तसे दर खरेदीदार सतत कमी देत असल्याचे पपई उत्पादकांचे म्हणणे आहे.