Papaya Rate: खानदेशात पपई दरात मोठी सुधारणा

Jalgaon News: उत्तरेकडून मोठी मागणी असतानाच उत्पादन कमी दिसत असल्याने खानदेशात पपई दरात मोठी किंवा आश्‍वासक सुधारणा झाली आहे. दर जागेवर किंवा शिवार खरेदीत शेतकऱ्यांना १७ रुपये प्रतिकिलो, असा मिळत आहे.

सध्या दर्जेदार पपई खानदेशात उपलब्ध आहे. पपईची आवक कमी झाली. उत्पादन हवे तसे नसताना कमी दर दिले जात असल्याचा मुद्दा नंदुरबार, धुळ्यात चर्चेत होता. अशात पपई उत्पादक, खरेदीदार आदींची बैठक शहादा (जि. नंदुरबार) येथे झाली. तेथे पपईदर जागेवर किंवा शिवार खरेदीत १७ रुपये प्रतिकिलो देण्याचा निर्णय झाला.

खानदेशात पपईची आवक घटली आहे. मागील हंगामात डिसेंबर व जानेवारीत पपईची मागणी कमी होती. तसेच दर जागेवर प्रतिकिलो सरासरी अडीच रुपये एवढा डिसेंबरमध्ये मागील वेळेस मिळाला. तर जानेवारीतही मागील वेळेस पपईदर कमी होते.

यंदा मात्र कुंभ मेळ्यासह अन्य कारणांनी पपईची मागणी आहे. दुसरीकडे पपईची आवक कमी आहे. सध्या रोज २२ ते २४ ट्रक (एक ट्रक १६ टन क्षमता) पपईची आवक खानदेशात होत आहे. त्यात राज्यातील बाजारातही पपईची मागणी आहे.

उत्तर भारतातूनही मागणी आहे. यामुळे पपई दर १२ ते १३ रुपये प्रतिकिलोवरून १७ रुपये प्रतिकिलो, असे पोचले आहेत. पपईची खरेदी सध्या पंजाब, हरियाना, काश्मीर, उत्तर प्रदेश, राजस्थान आदी भागातील खरेदीदार खानदेशातील एजंटच्या मदतीने करीत आहेत.