Orange Import Duty : बांगलादेशकडून संत्रा आयात शुल्कात पुन्हा वाढ

Nagpur News : नैसर्गिक संकटांमुळे उत्पादकता प्रभावित होत आधीच मेटाकुटीस आलेल्या संत्रा उत्पादकांच्या अडचणीत बांगलादेशकडून आयात शुल्कात करण्यात आलेल्या वाढीच्या परिणामी भर पडली आहे. बांगलादेशने पूर्वीच्या ८८ टका या आयात शुल्कात आता १०१ टका (बांगलादेशी चलन, ७१ रुपये भारतीय) अशी वाढ केली आहे.

महाराष्ट्रासह देशातील राजस्थान, मध्य प्रदेश या राज्यांमध्ये नागपुरी संत्रा घेतला जातो. त्यासोबतच पंजाबमध्ये किनो जातीच्या संत्र्याची लागवड आहे. महाराष्ट्रात सुमारे दीड लाख हेक्‍टरवर संत्रा लागवड असून, त्यातील एक लाख हेक्‍टर क्षेत्र एकट्या अमरावती जिल्ह्यात असून, नागपूर विभागात २५, तर उर्वरित महाराष्ट्रात २५ हजार हेक्‍टर याप्रमाणे क्षेत्र विस्तार आहे. राज्याची संत्रा उत्पादकता ही दहा लाख टन इतकी आहे.

पंजाबमधील किन्नो संत्रा चव आणि दर्जाच्या बाबतीत योग्य नसला तरी त्याला चकाकी राहते. त्यामुळे माहितीअभावी ग्राहकांची या संत्र्याला पसंती आणि मागणी देखील असते, असे व्यापारी सांगतात. परिणामी, नागपुरी संत्र्याला देशांतर्गत बाजारपेठेत दरासाठी संघर्ष करावा लागतो, अशी स्थिती आहे. बांगलादेश हा एकमेव नागपुरी संत्र्याचा आयातदार आहे. मात्र गेल्या तीन वर्षांत बांगलादेशकडून सातत्याने आयात शुल्कात वाढ करण्यात आली आहे. त्याचा निर्यातीवर मोठा परिणाम नोंदविण्यात आला आहे.

श्रमजीवी नागपुरी संत्रा उत्पादक कंपनीचे मुख्य कार्यकारी अधिकारी रमेश जिचकार यांनी दिलेल्या माहितीनुसार, सुरुवातीला आयात शुल्क कमी असल्याने निर्यात दोन लाख टनांपेक्षा अधिक होती. उर्वरित संत्रा फळांना देशांतर्गत बाजारपेठेत चांगला दर मिळत होता. त्यानंतरच्या काळात आयात शुल्क २२ टकांवरून ८८ आणि आता १०१ टका करण्यात आले आहे.

बांगलादेशी एक टका भारतीय रुपयांत ७१ पैसे होतो. त्यानुसार आयात शुल्क प्रति किलो ७१ रुपयांवर पोहोचले आहे. याचा परिणाम संत्र्याच्या निर्यातीवर होणार असल्याने उत्पादकांच्या अडचणीत वाढीची शक्‍यता वर्तविली जात आहे. यापूर्वी आयात शुल्कात वाढीच्या परिणामी निर्यात २ लाख टनांवरून २५ हजार टनांवर आली होती. त्यात पुन्हा घट झाल्यास चिंतेचा विषय होणार आहे.