Onion Rate: अहिल्यानगरला कांद्याचा दर १८०० रुपयांवर स्थिर

Ahilyanagar News: अहिल्यानगर जिल्ह्यातील बाजार समित्यांत कांद्याची आवक सुरू आहे. सध्या बाजार समितीत प्रति क्विंटल २०० ते १८०० रुपये प्रति क्विंटलवर कांद्याचा दर स्थिर आहे. कांद्याला सरासरी १२०० रुपये प्रति क्विंटलचा दर मिळत आहे. दर लिलावाला ५५ हजार गोण्यापर्यंत गावरान कांद्याची आवक होत आहे.

अहिल्यानगर जिल्ह्यात यंदा रब्बी आणि उन्हाळी क्षेत्रात दर वर्षीच्या तुलनेत कांद्याचे ८० हजार हेक्टर क्षेत्र वाढलेले होते. आता काढणी करून कांदा चाळीस साठवून ठेवला आहे. एप्रिल-मे महिन्यात मोठ्या प्रमाणात कांद्याची काढणी होते. मात्र मे महिन्यात काढणीच्या काळातच पाऊस पडत होता. अनेक भागांत जोरदार पाऊस झाल्याचा फटका कांद्याला बसला, पावसाने मोठ्या प्रमाणात कांद्याचे नुकसान झाले आहे.

भाजलेला कांदा चाळीत सडू लागला आहे. त्यामुळे बाजारात कांद्याची आवक सुरू आहे. अहिल्यानगर येथे दादा पाटील शेळके कृषी उत्पन्न बाजार समितीत सोमवार, गुरुवार आणि शुक्रवार असे तीन दिवस कांद्याचे लिलाव होतात. सध्या दर लिलावाला ५५ हजार गोण्यांपर्यंत आवक होत आहे. एक नंबरच्या कांद्याला १४०० ते १८०० रुपये, दोन नंबरच्या कांद्याला १ हजार ते १४०० रुपये, तीन नंबरच्या कांद्याला ५०० ते १ हजार रुपये व चार नंबरच्या कांद्याला २०० ते ५०० रुपयांचा दर मिळत आहे.

गेल्या काही दिवसांपासून प्रति क्विटंल २०० ते १८०० रुपयांवर स्थिर आहेत. अहिल्यानगर येथील दादा पाटील शेळके कृषी उत्पन्न बाजार समितीत कांदा उत्पादक शेतकऱ्यांना सुविधा व आणि शेतकरी हित जोपासले जात असल्याने कांदा विक्रीसाठी आणणाऱ्या शेतकऱ्यांची संख्या अधिक आहे.

शेतकऱ्यांची विश्वासार्हता आम्ही जपतो, असे बाजार समितीचे सभापती भाऊसाहेब बोठे, उपसभापती रभाजी सुळ यांनी सांगितले. कांदा विक्री केलेल्या शेतकऱ्यांना ऑनलाइन पेमेंट केले जात असल्याने शेतकरी समाधानी असल्याचे सचिव अभय भिसे यांनी सांगितले. अहिल्यानगरसह घोडेगाव (नेवासा) कोपरगाव, राहाता, शेवगाव, पाथर्डी, अकोले बाजार समितीतही कांदा आवक होत असून तेथेही १८०० रुपयांपर्यंत दर स्थिर असल्याचे सांगण्यात आले.