Onion Market : नामपूरमध्ये कांदा लिलाव १४ दिवस बंद राहणार

Nashik News : दिवाळी सणाच्या पार्श्‍वभूमीवर नामपूर येथील बाजार समितीच्या आवारातील कांद्याचे लिलाव मंगळवारपासून (ता. ७) २० नोव्हेबरपर्यंत बंद राहणार आहेत. ऐन कांद्याच्या दरवाढीच्या काळात पहिल्यांदा तब्बल दोन आठवडे कांदा मार्केट बंद राहणार असल्याने शेतकऱ्यांनी तीव्र नाराजी व्यक्त केली. बंदमुळे मार्केटची कोट्यवधी रुपयांची आर्थिक उलाढाल ठप्प होणार आहे. आर्थिक टंचाई, मंजूर टंचाई, कांदा व्यापाऱ्यांचा विनंती अर्ज आदी बाबींमुळे कांदा खरेदी मार्केट बंद राहणार आहे.

पणन संचालनालयाने अधिसूचना काढून तीन दिवसांपेक्षा जास्त दिवस बाजार समिती बंद ठेवता येणार नाही, असे स्पष्ट केले आहे. मात्र असे असताना तीन दिवसांपेक्षा अधिक दिवस बाजार बंद राहिल्यास शेतकऱ्यांसमोर अडचणी निर्माण होणार आहेत. त्यामुळे पणनच्या आदेशाला केराची टोपली दाखवली जाणार का? असा सवाल या निमित्ताने उपस्थित होत आहे.

मागणीच्या तुलनेत कांद्याच्या पुरवठ्यात घट झाल्यानंतर कांद्याला मागील सप्ताहात ५ हजार रुपये प्रतिक्विंटलपर्यंत दर मिळत होते; मात्र केंद्र शासनाने मागील सप्ताहात निर्यात शुल्क रद्द करून कांद्याला किमान निर्यात मूल्य प्रतिटन ८०० डॉलर केले. त्याचा फटका बाजार कामकाजावर झाला. त्यामुळे दरात दीड हजार रुपयांवर घसरण झाली. त्यामुळे शेतकऱ्यांचे कोट्यवधी रुपयांचे नुकसान झाले आहे.

केंद्र शासनाच्या शेतकरीविरोधी अस्थिर निर्णयामुळे शेतकऱ्यांसह व्यापारीही कमालीचे नाराज आहेत. त्यामुळे नामपूर शहर कांदा व्यापारी असोसिएशन यांच्या मागणीनुसार कांदा मार्केट दोन आठवडे बंद राहणार आहे. मात्र तीन दिवसांपेक्षा जास्त दिवस मार्केट बंद करू नये, असे आदेश पणन संचालक यांनी दिले असले तरी नामपूरसह जिल्ह्यातील अनेक बाजार समित्या बंद राहणार असल्याने बाजार समित्यांनी पणनच्या आदेशाला केराची टोपली दाखवली आहे. ऐन भाववाढीच्या काळात कांदा खरेदी बंद राहणार असल्याने शेतकऱ्यांनी नाराजी व्यक्त केली आहे.

नुकत्याच झालेल्या बाजार समितीच्या पंचवार्षिक निवडणुकीत जिल्हा परिषदेचे माजी शिक्षण सभापती यतींद्र पगार यांच्या नेतृत्वाखालील शेतकरी विकास पॅनेलने सर्वाधिक जागा जिंकून सत्ता मिळवली आहे. परंतु कांदा व्यापाऱ्यांच्या मनमानीमुळे बाजार समितीचे संचालक मंडळ टीकेची धनी होण्याची शक्यता आहे.