Orange Export : नागपुरी संत्रा आज जाणार मस्कतला

Nagpur News : चव आणि रंगासाठी ओळखल्या जाणाऱ्या नागपुरी संत्र्याला जागतिक बाजारपेठ उपलब्ध करून देण्याचा प्रयत्न महाऑरेंजकडून होत आहे. त्याच प्रयत्नांतर्गत शनिवारी (ता. ७) ओमानची राजधानी मस्कत येथे नागपुरी संत्र्याची पहिल्यांदाच निर्यात केली जाणार आहे.

नागपुरी संत्र्याची टिकवणक्षमता कमी आहे. परिणामी, त्याच्या निर्यातीला देखील मर्यादा आहेत. परंतु गेल्या काही वर्षांत या भागात संत्र्याची टिकवणक्षमता वाढीसाठी पूरक ठरणाऱ्या प्राथमिक प्रक्रिया केंद्राची संख्या वाढीस लागली आहे. पहिल्या टप्प्यातील प्रक्रियेत संत्रा फळांचे क्लिनिंग, ग्रेडिंग आणि त्यावर वॅक्‍स कोटिंग केले जाते.

हा पर्याय टिकवणक्षमता काही अंशी वाढीस पूरक ठरणारा आहे. यापूर्वी संत्र्याची बांगलादेशला निर्यात होत होती. परंतु गेल्या काही महिन्यांपासून तेथे राजकीय अस्थिरता निर्माण झाली आहे. परिणामी, निर्यात उत्पादनांचा रोख परतावा मिळत नसल्याचे व्यापारी सांगतात. त्यामुळे बांगलादेशला होणारी संत्रा निर्यात प्रभावित झाली आहे.

त्याचा फटका बसत देशांतर्गत बाजारात संत्र्याचे दर दबावात आले आहेत. त्यामुळेच इतर देशाची बाजारपेठ शोधण्याचा प्रयत्न सध्या होत आहे. त्याच प्रयत्नातून खासगी निर्यातदाराच्या माध्यमातून पहिल्यांदाच ओमानची राजधानी मस्कत येथे संत्रा निर्यात केली जाणार आहे. नागपूर विमानतळावरून शनिवारी (ता. ७) संत्र्याची १५०० किलोची पहिली खेप रवाना होणार आहे.