Agrowon Podcast: गव्हाचा बाजारभाव स्थिर; हरभरा, काकडी, केळी तसेच काय आहेत सोयाबीन भाव?

Market Bulletin:

गव्हाची आवक कायम

बाजारातील गव्हाची आवक वाढली आहे. तरीही गव्हाचे भाव मागील तीन आठवड्यांपासून टिकून आहेत. सरकारची गहू खरेदी सुरु झाल्यानंतर दरात काहीशी सुधारणा दिसून आली. सध्या बाजारात गव्हाची आवक चांगली आहे. मात्र दुसरीकडे गव्हाला उठावही चांगला आहे. त्यामुळे गव्हाचे भाव टिकून आहेत. देशातील महत्वाच्या उपादक राज्यांमध्ये गहू सध्या २ हजार ४०० ते २ हजार ८०० रुपयांच्या दरम्यान विकला जात आहे. पुढील महीनाभर गव्हाची आवक चांगली राहील, असा अंदाज गहू बाजारातील अभ्यासकांनी व्यक्त केला.

हरभरा दर टिकून

बाजारातील हरभरा आवक काहीशी कमी होताना दिसत आहे. आवक कमी झाली तशी हरभरा दरातही सुधारणा दिसून येत आहे. सध्या अनेक बाजारात भावपातळी हमीभावाच्या दरम्यान पोचली आहे. सध्या बाजारात हरभरा ५ हजार ४०० ते ५ हजार ७०० रुपयांच्या दरम्यान विकला जात आहे. त्यामुळे सरकारच्या हमीभाव खरेदीला शेतकऱ्यांचा कमी प्रतिसाद मिळत आहे. आतपर्यंत सरकारची खरेदी खूपच कमी झाली. तर बाजारातील हरभरा आवक पुढच्या काळात आणखी कमी होण्याचा अंदाज आहे. याचा आधार दराला मिळेल, असा अंदाज हरभरा बाजारातील अभ्यासकांनी व्यक्त केला.

काकडीचा बाजार टिकून

सध्या उन्हाचा चटका वाढल्याने काकडीला चांगली मागणी आहे. दुसरीकडे बाजारातील काकडीची आवक चांगली सुरु आहे. मागणी आणि आवक यामुळे राज्यभरात काकडीचा बाजार टिकून आहे. राज्याच्या वेगवेगळ्या भागात काकडीला सध्या १ हजार १०० ते १ हजार ८०० रुपयांच्या दरम्यान भाव मिळत आहे. काकडीची आवक पुढील काही आठवडे कायम राहील. त्यानंतर आवकेत घट येऊन दरात सुधारणा होऊ शकते, असा अंदाज व्यापारी आणि शेतकऱ्यांनी व्यक्त केला.

केळी दरावर दबाव

केळी बागांची काढणी वेगाने सुरु आहे. त्यामुळे बाजारातील केळीची आवक वाढली आहे. तर दुसरीकडे केळीची मागणी स्थिर आहे. त्यामुळे केळीच्या दरावर काहीसा दबाव आला आहे. केळीच्या दरात क्विंटलमागे १०० ते २०० रुपयांची नरमाई दिसत आहे. बाजारात केळी सध्या सरासरी १ हजार ४०० ते १ हजार ७०० रुपयांच्या दरम्यान विकली जात आहे. मध्य प्रदेशातही केळीच्या दरात नरमाई आली आहे. याचाही परिणाम केळीच्या भावावर दिसून येत आहे. केळीची बाजारातील आवक आणखी काही आठवडे कायम राहू शकते. त्यामुळे दरातही काहीसे चढ उतार दिसतील, असा अंदाज केळी बाजारातील अभ्यासकांनी व्यक्त केला.

सोयाबीन दबावातच

आंतरराष्ट्रीय बाजारात चढ उतार आणि देशातील बाजारात नाफेडची विक्री यामुळे सोयाबीनच्या दरावर दबाव आहे. बाजारातील सोयाबीनची आवक कमी आहे. मात्र नाफेडचा स्टाॅक जास्त असल्याने बाजारवर त्याचा परिणाम दिसून येत आहे. नाफेडची विक्री ४३०० ते ४ हजार ४०० रुपयांच्या दरम्यान सुरु आहे. तर प्रक्रिया प्लांट्सचे दर ४ हजार ५०० ते ४ हजार ५५० रुपयांच्या दरम्यान आहेत. बाजार समित्यांमध्ये सोयाबीन ४ हजार २०० ते ४ हजार ४०० रुपयांच्या दरम्यान विकाले जात आहे. सोयाबीनच्या दरातील चढ उतार कायम राहतील, असा अंदाज सोयाबीन बाजारातील अभ्यासकांनी व्यक्त केला.