Agrowon Podcast: हळदीचा बाजार स्थिरावला; कांद्याच्या दरात चढ-उतार, सोयाबीन व गहू स्थिरच!

Market Bulletin:

कांदा दर चढ उतार

कांद्याच्या दरात मागील दोन दिवसांमध्ये अनेक बाजारात चढ उतार दिसून आले. नाफेड आणि एनसीसीएफच्या खरेदीचे कमी भाव, बाजारातील आवक आणि उत्पादन वाढीच्या अंदाजामुळे दरावर दबाव आल्याचे अभ्यासकांचे म्हणणे आहे. कांद्याचा भाव अनेक बाजारात आज १०० रुपयांपर्यंत कमी दिसून आला. बाजारात आज कांद्याला १३०० ते १५०० रुपयांच्या दरम्यान भाव होता. बाजारातील कांदा आवक मर्यादीत आहे. पुढील काही आठवडे आवक कमीच राहण्याची शक्यता आहे. त्यामुळे दरात पुढे हळूहळू सुधारणा होऊ शकते, असा अंदाज अभ्यासकांनी दिला. 

चिंच भाव दबावात

मागील काही आठवड्यांमध्ये चिंचेच्या भावात काहीशी नरमाई आली आहे. पावसामुळे चिंचेला कमी उठाव आहे. त्यामुळे मागणी कमी असल्याचे व्यापारी सांगत आहेत. त्याचा परिणाम चिंचेच्या भावावर दिसून आला. चिंचेला बाजारात सध्या सरासरी ६ हजार ते ७ हजार रुपये भाव मिळत आहे. मागील एक महिन्यात भाव जवळपास ३ हजारांनी कमी झाले आहेत. पुढील काही आठवडे चिंचेची मागणी कमीच राहण्याची शक्यता आहे. मात्र सणांच्या काळात मागणी वाढून दरात पुन्हा सुधारणा दिसू शकते, असा अंदाज व्यापारी व्यक्त करत आहेत. 

हळदीची मागणी स्थिर

हळदीचे भाव मागील २ आठवड्यांपासून स्थिरावले आहेत. पावसामुळे लग्न सराईतून येणारी मागणी काहीशी कमी झाली आहे. तसेच आंतरराष्ट्रीय बाजारात निर्माण झालेल्या अनिश्चित परिस्थितीमुळे निर्यातीवरही परिणाम होत आहे. याचा परिणाम दरावरही दिसत आहे. हळदीचे भाव मागील महीनाभरात क्विंटलमागे ५०० ते एक हजार रुपयाने कमी झाले आहेत. सध्या हळद ११ हजार ते १२ हजाराने विकली जात आहे. हळदीची मागणी पुढील काही आठवडे वाढण्याची शक्यता दिसत नाही. सणांची मागणी आल्यानंतर ऑगस्टपासून मागणी आणि दरातही सुधारणा होऊ शकते, असा अंदाज अभ्यासकांनी व्यक्त केला. 

गव्हाचे दर स्थिर

देशातील बाजारात नव्या मालाची आवक आणि सरकारने लादलेले स्टाॅक लिमिट यामुळे गव्हाचे भाव स्थिरावले आहेत. बाजारातील गव्हाची आवकही कमी होत आहे. गव्हाचे भाव मागील महिनाभरात जवळपास २०० रुपयांनी कमी झाले आहेत. सध्या गहू २ हजार २०० ते २ हजार ५०० रुपयांच्या दरम्यान विकला जात आहे. पुढील काळात गव्हाची आवक कमी होणार आहे. मात्र पुढील महिनाभरानंतर सणांची मागणी सुरु होईल. त्यामुळे गव्हाला उठाव राही. या परिस्थितीत गव्हाच्या दरात सुधारणा होऊ शकते, असा अंदाज गहू बाजारातील अभ्यासकांनी व्यक्त केला. 

सोयाबीन दबावातच

देशातील बाजारात सोयाबीनचा भाव दबावातच आहे. सोयाबीनचे दर मागील २ महिन्यांपासून एकाच पातळीवर दिसत आहेत. सोयाबीनला बाजारात सध्या ४ हजार ते ४ हजार २०० रुपयांच्या दरम्यान भाव मिळत आहे. नाफेडची सोयाबीन विक्रीही ४ हजार ३०० ते ४ हजार ३५० रुपयाने होत आहे. सध्या बाजारातील सोयाबीनची विक्री खूपच कमी झाली. मात्र सोयाबीनचा पुरवठा चांगला आहे. तसेच डीडीजीएसमुळे मागणीही थंडावलेलीच आहे. याचा परिणाम दरावर दिसून येत आहे. सोयाबीनचा भाव पुढील काही आठवडे कायम राहू शकतो, असा अंदाज अभ्यासकांनी व्यक्त केला.