Agrowon Podcast: हळदीच्या दरात सुधारणा; तूर, पपई, कापूस तसेच काय आहेत सोयाबीन भाव?

Market Bulletin:

सोयाबीनमध्ये नरमाई

आंतरराष्ट्रीय बाजारातही सोयाबीन आणि सोयापेंडच्या भावात चढ उतार सुरु आहेत. आज सोयाबीनचे वायदे दुपारपर्यंत १०.३७ डाॅलर प्रतिबुशेल्सवर होते. तर सोयापेंडचे वायदे कमी होऊन २९४ डाॅलर प्रतिटनांवर होते. देशात सोयाबीनच्या बाजारावरील दबाव कायम आहे.

देशात आजही सोयाबीनला ३ हजार ८०० ते ४ हजारांचा भाव मिळाला. तर प्रक्रिया प्लांट्सनी खरेदीचे भाव आजही ४ हजार ३०० ते ४ हजार ४०० रुपयांच्या दरम्यान काढले होते. देशातील खुल्या बाजारातील सोयाबीनची आवक वाढत आहे. सोयाबीनवरील दबाव कायम राहील, असा अंदाज सोयाबीन बाजारातील अभ्यासकांनी व्यक्त केला.

कापसाचे भाव स्थिर

कापसाच्या भावावरील दबाव आजही कायम होता. सीसीआयची खरेदी वाढत असली तरी त्याचा आधार खुल्या बाजाराला मिळताना दिसत नाही. तसेच पुढे कापूस आणि सुताला उठाव नसल्याचे उद्योगांकडून सांगण्यात येत आहे. त्याचा परिणाम दरावर दिसून येत आहे. कापसाची आवक सरासरी सव्वा लाख गाठींच्या दरम्यान आहे.

खुल्या बाजारात सरासरी भावपातळी ७ हजार ते ७ हजार ३०० रुपयांच्या दरम्यान आहे. वायद्यांमध्ये कापसाच्या भावात काहीसे चढ उतार सुरु आहेत. आंतरराष्ट्रीय बाजारातही भावावरील दबाव कायम आहे. देशातील बाजारात कापसाची आवक आणखी काही आठवडे चांगली राहील, असा अंदाज कापूस बाजारातील अभ्यासकांनी व्यक्त केला.

तुरीचा भाव दबावात

बाजारात तुरीची आवक वाढत आहे तसे तुरीचा भावही कमी होत आहे. आवक वाढत असलेल्या बाजारात तुरीला ६ हजारांपासून दर मिळत आहे. तर सरासरी दर आता ६ हजार ७०० ते ७ हजारांच्या दरम्यान पोचला.

दुसरीकडे तुरीला यंदा ७ हजार ५५० रुपये हमीभाव सरकारने जाहीर केला. सरकारनेही राज्यात तुरीची खरेदी जाहीर केली. मात्र बाजारातील आवक वाढल्यानंतर तुरीच्या भावावरील दबाव आणखी काही आठवडे कायम राहू शकतो, असा अंदाज तूर बाजारातील अभ्यासकांनी व्यक्त केला.

हळदीचा भाव चढ उतार

देशात हळदीला चांगली मागणी आणि सध्याची कमी आवक यामुळे दरात चढ उतार सुरुच आहे. काही बाजारात नवा माल येत असला तरी आवक कमीच आहे. त्यामुळे मागील दोन दिवसांमध्ये हळदीच्या भावात काही बाजारांमध्ये सुधारणा दिसून आली.

आज बाजारात हळदीला वाण आणि गुणवत्तेप्रमाणे प्रतिक्विंटल सरासरी १२ हजार ते १७ हजार रुपयांच्या दरम्यान भाव मिळाला. पुढील दोन-तीन आठवड्यांमध्ये बाजारातील हळदीची आवक आणखी वाढण्याचा अंदाज आहे. त्यामुळे दरावरही याचा परिणाम जाणवेल, असा अंदाज हळद बाजारातील अभ्यासकांनी व्यक्त केला.

पपईच्या दरात सुधारणा

पपईला सध्या चांगली मागणी आहे. त्यामुळे पपईचे भावही तेजीत आले आहेत. पपईच्या भावात १ हजारांपासून वाढ झाली आहे. कुंभ मेळावा आणि इतर कारणांमुळे पपईला चांगला उठाव आहे. राज्यातील पपई संपूर्ण देशात जात आहे.

वेगवेगळ्या राज्यातील खरेदीदार सध्या पपई खरेदीसाठी राज्यात दाखल झालेले आहेत. त्यामुळे पपईला सध्या १७०० ते १८०० रुपयांचा भाव मिळत आहे. यंदा पपईची लागवड सरासरीपेक्षा कमीच होती. त्यामुळे आवकही मर्यादीत आहे. पपईचा बाजारभाव आणखी काही आठवडे कायम राहू शकतो, असा अंदाज पपई बाजारातील अभ्यासकांनी व्यक्त केला.