Agrowon Podcast: पपई दर टिकून; आले चढ-उतारात, काकडीला उठाव, उडीद व कापूस दर दबावात

थोडक्यात माहिती...

आल्याच्या दरात चढ-उतार: पावसामुळे आवक अनियमित असल्यामुळे सध्याचे सरासरी दर २७०० ते ३५०० रुपये प्रति क्विंटल आहे.

काकडीला चांगला उठाव: आवक घटली असून दर २००० ते ३००० पर्यंत टिकून.

उडदाचे दर दबावात: आवक कमी असूनही आयात व उत्पादन जास्त, दर ६३०० ते ६७०० रुपयांदरम्यान आहे.

पपईचे दर स्थिर: आवक घटल्याने सरासरी १७०० ते २००० दर टिकून.

कापूस बाजारात दबाव: सीसीआय विक्रीमुळे दरावर दबाव, सरासरी दर ७००० ते ७२०० रुपयांपर्यंत आहे.

Market Bulletin:

आल्याच्या भावात चढ उतार

आल्याच्या भावात मागील काही आठवड्यांपासून काहीसे चढ उतार सुरु आहेत. पावसामुळे अनेक बाजारांमधील आवक स्थिर दिसत नाही. त्याचा दरावर परिणाम होत आहे. राज्यातील बाजारात सध्या आल्याला प्रतिक्विंटल सरासरी २ हजार ७०० ते ३ हजार ५०० रुपयांच्या दरम्यान दर मिळत आहे. पुणे बाजारातील सरासरी दर सर्वात कमी १५०० रुपयांच्या दरम्यान आहे. तर नाशिक, मुंबई, नागपूर आणि इतर मोठ्या बाजारांंमध्ये आले २ हजार ५०० ते ३ हजार ५०० रुपयांच्या दरम्यान विकले जात आहे. पुढील काळातही बाजारातील आल्याची आवक कायम राहण्याची शक्यता आहे. त्यामुळे आल्याच्या दरातही चढ उतार राहू शकतात, असा अंदाज आले बाजारातील अभ्यासकांनी व्यक्त केला. 

काकडीला उठाव

काकडीची बाजारातील आवक कमी झाली आहे. अनेक बाजारातील आवक १०० क्विंटलपेक्षाही कमी झाली. केवळ पुणे, मुंबई, नाशिक, नागपूर अशा बाजारांमधील आवक जास्त आहे. तर दुसरीकडे काकडीला उठावही चांगला आहे. त्यामुळे काकडीचे दर टिकून आहेत. राज्यातील बहुतांशी बाजारांमध्ये काकडीला सरासरी २ हजार ते २ हजार ५०० रुपयांच्या दरम्यान भाव मिळत आहे. तर  आवक कमी असलेल्या मोठ्या बाजारांमध्ये सरासरी दर ३ हजारांपर्यंतही आहे. काकडीची आवक आणखी काही आठवडे कमी राहण्याची शक्यता आहे. त्यामुळे दरही टिकून राहतील, असा अंदाज व्यापारी व्यक्त करत आहेत. 

उडदाचे भाव दबावातच

राज्यातील बाजारात उडदाची आवक कमी आहे. बहुतांशी बाजारातील आवक ५० क्विंटलपेक्षाही कमी आहे. यापेक्षा जास्त आवक असलेले बाजार खूपच कमी आहेत. तरीही उडदाचे भाव दबावातच आहेत. देशातील बाजारात सध्या उडदाला सरासरी ६ हजार ३०० ते ६ हजार ७०० रुपयांच्या दरम्यान भाव मिळत आहे. देशात यंदा उडदाची आयात वाढली. तसेच देशातील उत्पादनही चांगले राहीले. त्यामुळे पुरवठा चांगला आहे. याचा दबाव दरावर येत आहे. उडदाची आवक खरिपातील माल येईपर्यंत कमीच राहील. मात्र, देशातील साठ्याचा दरावर दाबव राहील. त्यामुळे भाव पुढील काही आठवडे स्थिर राहू शकतात, असा अंदाज उडीद बाजारातील अभ्यासकांनी व्यक्त केला. 

पपईचे दर स्थिर

राज्यातील बाजारात पपई आवक खूपच कमी झाली. पावसामुळे राज्यातील बहुतांशी भागातील पपईच्या पिकावर परिणाम झाल्याचे शेतकरी सांगत आहेत. पपईची काढणीही कमी झाली. त्यामुळे आवकेवर परिणाम झाला. सध्या बाजारात पपईला मागणीदेखील मर्यादीतच आहे. पण कमी आवकेमुळे दर टिकून आहेत. राज्यातील बाजारात पपईला सरासरी १७०० ते २ हजार रुपये दर मिळत आहे. सध्या राज्यातील पुणे आणि मंबई बाजारातच आवक जास्त दिसत आहे. पुढील काही आठवडे पपईची आवक कमीच राहण्याची शक्यता आहे. त्यामुळे दरही टिकून राहतील, असा अंदाज व्यापारी व्यक्त करत आहेत. 

कापूस दबावातच

देशातील बाजारात कापसाची आवक कमी आहे. शेतकऱ्यांकडे सध्या कापूस कमी प्रमाणात शिल्लक आहे. मात्र, सीसीआयची कापूस विक्री सुरुच आहे. सीसीआयने आतापर्यंत ३३ लाख गाठी कापूस विकला. सीसीआयच्या विक्रीला चांगला प्रतिसाद मिळत आहे. तसेच विक्रीचे दरही कमी झाले आहेत. याचा दबाव कापसाच्या दरावर येत आहे. कापसाला सध्या बाजारात सरासरी ७ हजार ते ७ हजार ३०० रुपये दर मिळत आहेत. देशात कापसाला उठाव स्थिर आहे. पुरवठा चांगला आहे. त्यामुळे कापसाचे दर दबावातच राहू शकतात, असा अंदाज कापूस बाजारातील अभ्यासकांनी व्यक्त केला.   

वारंवार विचारले जाणारे प्रश्न

१. आल्याच्या दरात चढ-उतार का होत आहेत?
पावसामुळे बाजारात आवक कमी-जास्त होत असल्याने दर बदलत आहेत.

२. काकडीला सध्या चांगला दर का मिळतोय?
बाजारात काकडीची आवक कमी आहे आणि मागणी चांगली आहे, त्यामुळे दर टिकून आहेत.

३. उडदाचे दर कमी का आहेत?
देशात उडदाची आयात आणि उत्पादन वाढल्यामुळे साठा जास्त आहे, त्यामुळे दर दबावात आहेत.

४. पपईचे दर टिकून का आहेत?
पावसामुळे उत्पादन आणि काढणी दोन्ही कमी झाले असल्याने दर टिकून राहिले आहेत.

५. कापसाचे दर वाढत का नाहीत?
सीसीआयने मोठ्या प्रमाणावर कापूस विकला आहे आणि पुरवठा चांगला असल्यामुळे दर वाढत नाहीत.