Agrowon Podcast : मक्याचा बाजारभाव टिकून; कापूस, सोयाबीन, टोमॅटो तसेच काय आहेत हळद दर?

Market Bulletin :

सोयाबीनमध्ये चढ उतार

आंतरराष्ट्रीय बाजारात सोमवारी सोयाबीन आणि सोयापेंडच्या भावात सुधारणा झाल्यानंतर आज नरमाई दिसून आली. सोयापेंडच्या वायद्यांनी आज दुपारपर्यंत ९.८७ डाॅलरची पातळी गाठली होती. तर सोयापेंडचे वायदे ३०१ डाॅलरवर पोचले होते. आंतरराष्ट्रीय बाजारात सोयाबीनमध्ये काहीसे चढ उतार दिसून येत आहेत.

मात्र देशात भाव किमान पातळीवर स्थिर दिसत आहेत. आजही देशातील बाजारात सोयाबीनला सरासरी ३ हजार ९०० ते ४ हजार १०० रुपयांचा भाव मिळाला. सोयाबीनच्या भावावरील दबाव आणखी काही आठवडे कायम राहील, असा अंदाज अभ्यासकांनी व्यक्त केला.

कापूस दबावातच

देशातील बाजारात कापसाची आवक शिगेला पोचलेली आहे. त्याचा दबाव बाजारावर दिसून येत आहे. त्यामुळे कापसाच्या भावात सुधारणा दिसून आलेली नाही. कापसाचा भाव आजही ६ हजार ८०० ते ७ हजार २०० रुपयांच्या दरम्यान होता. तर आंतरराष्ट्रीय बाजारात आज शुक्रवारच्या तुलनेत दरात सुधारणा दिसून आली.

आज दुपारपर्यंत दरपातळी ६८.८७ सेंट प्रतिपाऊंडच्या दरम्यान होती. शुक्रवारच्या तुलनेत भावपातळी जवळपास एक टक्क्याने अधिक होती. जानेवारीतही देशातील बाजारात कापसाची आवक चांगली राहण्याचा अंदाज आहे. त्यामुळे दरपातळीही स्थिर राहू शकते, असा अंदाज अभ्यासकांनी व्यक्त केला.

हळदीच्या भावात सुधारणा

हळदीला वाढती मागणी आणि कमी आवक यामुळे हळदीच्या भावात सुधारणा दिसून आली. गेल्या तीन दिवसांमध्ये हळदीचे भाव बहुतांशी बाजारांमध्ये क्विंटलमागे ७०० ते १००० रुपयाने सुधारले आहेत. हळद पिकाचे वाढत असलेले नुकसान आणि सध्याची टंचाई याचा परिणाम बाजारावर दिसत आहे.

आज देशातील बाजारात हळदीला सरासरी १३ हजार ते १६ हजार रुपयांचा भाव मिळाला. नव्या मालाची आवक पुढील ३ आठवड्यांमध्ये सुरु होण्याची शक्यता आहे. त्यामुळे दरात काही आठवडे चढ उतार राहू शकतात, असा अंदाज अभ्यासकांनी व्यक्त केला.

मक्याला आधार

मक्याला यंदाही इथेनाॅलसाठी चांगली मागणी आहे. त्यामुळे मका बाजाराला आधारही मिळत आहे. मागील काही दिवसांपासून मका आता हमीभावाच्या पुढे सरकत आहे. मक्याचा सरासरी भाव अनेक बाजारात आता २ हजार १०० ते २ हजार २५० रुपयांच्या दरम्यान दिसत आहे. बाजारातील मक्याची आवकही कमी होत आहे.

तर दुसरीकडे रब्बीतील मका लागवड अपेक्षेप्रमाणे वाढली नाही. यामुळे देखील मका बाजाराला भविष्यात आधार मिळणार आहे. त्यामुळे मक्याचा भाव पुढील काळात सुधारू शकतो, असा अंदाज मका बाजारातील अभ्यासकांनी व्यक्त केला.

टोमॅटो दबावात

बाजारात सध्या टोमॅटोची आवक वाढत आहे. वाढत्या आवकेचा टोमॅटोच्या भावावर काही प्रमाणावर दबाव येत आहे. टोमॅटोच्या भावातील घसरण सुरुच आहे. बहुतांशी बाजारांमध्ये टोमॅटोचा भाव मागील तीन आठवड्यांमध्ये जवळपास १ हजाराने कमी झाला. अनेक बाजारात सरासरी भाव आता १ हजाराच्या खाली आला.

आज बाजारात टोमॅटोला सरासरी ७०० ते १ हजार ४०० रुपयांच्या दरम्यान भाव मिळाला. टोमॅटोची बाजारातील आवक पुढील काही आठवडे कायम राहू शकते, असा अंदाज व्यापारी आणि अभ्यासकांनी व्यक्त केला.