Agrowon Podcast : पुढील काळात कापसाच्या भावात आणखी सुधारणा होण्याची शक्यता

1. सोयाबीनचा बाजार वाढण्याची शेतकरी वाट पाहत आहेत. पण देशात तसचं आंतरराष्ट्रीय बाजारात सोयाबीन दर स्थिर आहेत. यंदा खाद्यतेल आयात स्वस्त झाली तसेच २५ टक्क्यांनी वाढली. याचा दबाव सोयाबीनवर आला. यंदा गाळपही कमी दिसते. त्यामुळे पुढील हंगामासाठी शिल्लक साठा विक्रमी पातळीवर पोचला. सध्या सोयाबीनला सरासरी ४ हजार ४०० ते ४ हजार ९०० रुपयांचा भाव मिळतोय. हा भाव आणखी काही दिवस दिसू शकतो, असा अंदाज अभ्यासकांनी व्यक्त केला.

2. हरभरा बाजार मागील काही दिवसांपासून वाढलेला दिसतो. बाजारातील घटलेली आवक, सणांमुळे वाढलेली मागणी आणि दुष्काळी स्थिती यामुळे हरभरा भावात वाढ झाली. विशेष म्हणजे नाफेडची हरभरा विक्री सुरु असताना देखील हरभरा भाव वाढत आहेत. सध्या हरभऱ्याला प्रतिक्विंटल ५ हजार २०० ते ५ हजार ६०० रुपयांचा भाव मिळत आहे. ऐन सणांच्या काळात हरभरा भाव आणखी वाढू शकतात, असा अंदाज जाणकारांनी व्यक्त केला.
 

3. हळदीच्या भावातील तेजी गेल्या काही दिवसांपासून टिकून आहे. बाजारातील हळदीची आवक दिवसेंदिवस कमी होत आहे. तर दुसरीकडे देशातील बाजारात आणि निर्यातीसाठी हळदीला मागणी वाढली. यामुळे हळदीच्या भावात तेजी आली. सध्या हळदीला बाजारात प्रतिक्विंटल ११ हजार ते १४ हजार रुपयांचा भाव मिळत आहे. यंदाही हळदीची लागवड कमी दिसते. त्यामुळे हळदीचे भाव पुढील काळातही तेजीतच राहू शकतात, असा अंदाज जाणकारांनी व्यक्त केला. 

4. लाल मिरचीचे भाव सध्या तेजीत आहेत. गेल्या हंगामात देशातील मिरचीचे उत्पादन घटले होते. तर चालू हंगामातील लागवड कमी झाली. परिणामी मिरचीला चांगला उठाव आहे. सध्या बाजारात येणाऱ्या मालाचे प्रमाणही कमी आहे. त्यामुळे लाल मिरचीला व्हरायटीप्रमाणे प्रतिक्विंटल १७ हजार ते ३५ हजार रुपयांचा भाव मिळत आहे. लाल मिरची यंदा चांगलाच भाव खाण्याची शक्यता आहे, असे मिरची बाजारातील व्यापारी सांगत आहेत. 

5. कापूस बाजार गेल्या काही दिवसांपासून स्थिर दिसतो. देशात आणि आंतरराष्ट्रीय बाजारातील वायद्यांमध्ये मात्र काहीसे चढ उतार सुरु आहेत. देशात सध्या कापसाला प्रतिक्विंटल सरासरी ७ हजार ते ८ हजार रुपये प्रतिक्विंटलचा भाव मिळतोय. तर वायद्यांमध्ये आज दुपारपर्यंत कापसाचे भाव काहीसे नरमले होते. वायद्यांमध्ये दुपारपर्यंत भाव ५९ हजार ८२० रुपये प्रतिखंडीचा भाव मिळत आहे. तर आंतरराष्ट्रीय बाजारात कापसाचे वायदे गेल्या आठवडाभरापासून ८५ सेंटभोवती फिरत आहेत. आंतरराष्ट्रीय बाजारातील वायदे आज दुपारपर्यंत ८४.२० सेंट प्रतिपाऊंडवर होते.

कापसाचा भाव स्थिरावल्याने बाजारातील आवकही स्थिर दिसते. बाजारात ७ हजार गाठींची आवक झाल्याचं व्यापाऱ्यांनी सांगितलं. दुसरीकडं देशातील कापूस लागवड आतापर्यंत २ टक्क्यांनी कमी दिसते. पिकाला कमी पावसाचा फटकाही बसत आहे. महत्वाच्या कापूस उत्पादक मराठवाडा, विदर्भ आणि खानदेशातील अनेक भागांमध्ये जवळपास एक महिन्यापासून पाऊस नाही. याचा परिणाम कापूस पिकावर होताना दिसत आहे. कापूस उत्पादकता यंदा मोठ्या प्रमाणात घटण्याची शक्यता आहे. यामुळे पुढील काळात कापसाच्या भावात आणखी सुधारणा होऊ शकते? असा अंदाज जाणकारांनी व्यक्त केला.