Agrowon Podcast : उडदाचे भाव दबावातच ; आजचे हरभरा बाजारभाव, लसूण दर, उडीद भाव, शेवगा

हरभरा दर दबावातच

देशातील बाजारात हरभरा दर दबावातच आहेत. हरभऱ्याची वाढलेली आयात तसेच पिवळा वाटाण्याच्या खुल्या आयातीला दिलेली मुदतवाढ, यामुळे हरभरा दर कमी आहेत आहेत. हरभरा आयातीवरही केवळ १० टक्के आयात शुल्क आहे.

त्यामुळे हरभरा आयात वाढत आहे. परिणामी सध्या बाजारात हरभरा ५ हजार ३०० ते ५ हजार ५०० रुपयांच्या दरम्यान विकला जात आहे. हरभरा आवक बाजारात कमीच आहे. पुढील काळात आवक आणखी कमी होईल. पण आयातीचा दबाव आहे. सणांच्या काळात मागणी वाढल्यानंतर दरात काहीशी सुधारणा दिसू शकते, असा अंदाज हरभा बाजारातील अभ्यासकांनी व्यक्त केला.

लसूण तेजीत

लसणाच्या बाजारात मागील काही दिवसांपासून सुधारणा दिसून आली. बाजारतील लसणाची आवक वाढलेल्या पावासामुळे कमी झाली होती. मात्र लग्नसराई आणि समारंभामुळे लसणाला उठाव चांगला होता. त्यामुळे लसणाच्या भावात दोन आठवड्यांमध्ये सरासरी ५०० ते १ हजार रुपयांची वाढ दिसून आली.

लसणाचे भाव राज्यातील बहुतांशी बाजारांमध्ये सध्या ७ हजार ते ८ हजार रुपये प्रतिक्विंटलच्या दरम्यान होते. लसणाची बाजारातील आवक पुढील काही आठवडे कायम राहू शकते. तसेच त्यानंतर आवक कमी होण्याची शक्यता आहे. त्यामुळे दरातही सुधारणा होऊ शकते, असा अंदाज व्यापारी व्यक्त करत आहेत.

शेवगा दर तेजीतच

बाजारातील शेवग्याची आवक कमीच आहे. त्यामुळे शेवग्याचे भावही तेजीतच आहेत. शेवगा पिकाला यंदा पाऊस आणि बदलत्या वातावरणाचा मोठा तडाखा बसला. त्यामुळे शेवग्याची आवक कमी आणि उठाव चांगला अशी परिस्थिती आहे.

त्यामुळे शेवग्याचे भाव तेजीत आहेत. शेवगा आजही ५ हजार ते ६ हजार रुपये प्रतिक्विंटलच्या दरम्यान विकला गेला. शेवग्याची बाजारातील आवक पुढील काळातही कमीच राहण्याचा अंदाज आहे. तर मागणीह टिकून राहील. त्यामुळे शेवग्याचे भाव तेजीतच राहू शकतात, असा अंदाज व्यापारी व्यक्त करत आहेत.

चिंचेला उठाव कमी

बाजारातील चिंचेची आवक मर्यादीत दिसत आहे. मात्र पावसामुळे मागणीवर काहीसा परिणाम झाल्याचे व्यापारी सांगत आहेत. त्यामुळे चिंचेच्या दरात काहीसे चढ उतार सुरु झाल्याचे दिसत आहे. चिंचेचे दर अनेक बाजारात काहीसे कमी झाले आहेत. दुसरीकडे बाजारातील आकही कमी आहे.

पण चिंचेला सध्या ७ हजार ते ११ हजार रुपये प्रतिक्विंटलच्या दरम्यान भाव मिळत आहे. चिंचेची बाजारातील आवक आणखी काही आठवडे कायम राहण्याचा अंदाज आहे. तर पावसामुळे मागणीही स्थिर राहू शकते. परिणामी चिंचेच्या दरात चढ उतार कायम राहू शकतात, असा अंदाज चिंच बाजारातील अभ्यासकांनी व्यक्त केला.

उडदाचे भाव दबावात

बाजारातील उडदाची आवक कमीच आहे. मागणीपेक्षा सध्याची आवक कमी असल्याचे व्यापारी सांगत आहेत. मात्र तरीही उडदाला हमीभावापेक्षा कमी भाव मिळत आहे. बाजारात सध्या उडीद ६ हजार ते ६ हजार ५०० रुपयाने विकला जात आहे.

बाजारातील उडदाची आवक पुढील दोन महीने कमीच राहण्याची शक्यता आहे. मात्र आयातही सुरु आहे. आयातीमुळे दर दबावात आहेत. बाजारातील ही परिस्थिती पुढील काळातही कायम राहू शकते. उडदाच्या भावात पुढील काळात काहीसे चढ उतार दिसू शकतात, असा अंदाज उडीद बाजारातील अभ्यासकांनी व्यक्त केला.