Chana Market : हरभरा दरावर वाटाणा आयात निर्णयाचा परिणाम

Chana : नमस्कार शेतकरी मित्रांनो, बाजाराचा आठवड्याचा आज पहिला दिवस. त्यामुळे बाजारात नेमकं काय घटतं याकडे सर्वांच लक्ष असतं. याची माहिती शेतकऱ्यांनाही आवश्यक असते.
त्यामुळे आज आपण शेतमार्केट बुलेटीनमधून शेतीमाल बाजारातील महत्वाच्या पाच घडामोडींची माहिती घेणार आहोत.

आंतरराष्ट्रीय बाजारात सोयाबीन आणि सोयापेंडवरील दबाव कायम आहे. सोयापेंडच्या भावाने तब्बल दोन महिन्यातील निचांकी पातळी गाठली होती. दुपारपर्यंत सोयापेंडचे वायदे ३९५ डाॅलर प्रतिटनांपर्यंत कमी झाले होते. तर सोयाबीन १३.१२ डाॅलरवर होते. देशातील बाजारातही सोयाबीनवर याचा दबाव दिसून आला.

प्रक्रिया प्लांट्सनी खरेदीचे भाव क्विंटलमागं २५ ते ५० रुपयांनी कमी केले होते. बाजार समित्यांमध्ये भावपातळी ४ हजार ५०० ते ४ हजार ८०० रुपयांच्या दरम्यान आहेत. सोयाबीन बाजारात आणखी काही दिवस चढ उतार राहू शकतात, असा अंदाज सोयाबीन बाजारातील अभ्यासकांनी व्यक्त केला.

देशातील बाजारात कापूस भाव दबावातच आहेत. कापसाचे नवा हंगाम सुरु झाल्यापासून ६ हजार ६०० ते ७ हजार २०० रुपयांच्या दरम्यान दिसतात. आजही भावपातळी याच दरम्यान होती. वायदे मात्र २४० रुपयाने कमी झाले होते.

वायदे ५६ हजार ४२० रुपये प्रतिखंडीवर होते. तर आंतरराष्ट्रीय बाजारात कापसाचे भाव काहीसे स्थिरावले आहेत. नुकत्याच संपलेल्या आठवड्यात गेल्या आठवड्याच्या तुलनेत आवक काहीशी अधिक होती, असे व्यापाऱ्यांनी सांगितले. तसेच आवकेची ही स्थिती आणखी महिनाभर दिसू शकते, असा अंदाज कापूस बाजारातील अभ्यासकांनी व्यक्त केला.

जिऱ्याच्या बाजाराने मागील ११ वर्षातील उच्चांकी भाव दाखविल्यानंतर पुन्हा मान टाकली. वायद्यांमध्ये तर ऑगस्टमध्ये ६५ हजार रुपये प्रतिक्विंटलचा टप्पा गाठल्यानंतर आता ३३ हजारांपर्यंत बाजार कमी झाला. बाजार समित्यांमध्येही ६० हजारांवरून भाव आता ३६ ते ३९ हजार रुपयांवर आले.

दरात एवढी घसरण होण्याचे मुख्य कारण आहे लागवडीत झालेली वाढ आणि उत्पादन वाढीचा अंदाज. गुजरातमध्ये लागवड ९४ टक्क्यांनी वाढली तर राजस्थानमध्ये जवळपास १५ टक्क्यांनी पेरा जास्त आहे. यामुळे बाजारात नकारात्मक वातारण असल्याचे व्यापारी सांगतात. त्याचा परिणाम जिऱ्याच्या भावावर दिसून आला.

केंद्र सरकारने पिवळा वाटाणा आयात शुल्कमुक्त केल्याचा दबाव हरभरा बाजारावर दिसून येत आहे. तसेच नोव्हेंबरमध्ये झालेल्या पावसाचा फायदा हरभरा पिकाला होऊ शकतो.  त्यामुळे हरभरा उत्पादकता काहीशी वाढू शकते, असे सरकारचे म्हणणे आहे.

पण दुसरीकडे हरभरा लागवड जवळपास १० टक्क्यांनी पिछाडीवर आहे. तरीही हरभरा भाव क्विंटलमागं ५०० रुपयांनी कमी होऊन ५ हजार ३०० ते ५ हजार ८००  रुपयांच्या दरम्यान आहेत. पिवळा वाटाणा आयात वाढून देशात कडधान्याचा पुरवठा वाढू शकतो, या शक्यतेमुळे देशातील बाजारावर परिणाम झाला, असे कडधान्य बाजारातील अभ्यासकांनी सांगितले.

टोमॅटो बाजारातील नरमाई अजूनही कायम आहे. बाजारातील आवक सध्या चांगली दिसत आहे. तर टोमॅटोचा उठाव सरासरी आहे. बाजारातील आवक मागील काही दिवसांपासून वाढल्याचा परिणाम दरावर दिसत आहे.

टोमॅटोचा भाव सध्या सरासरी १ हजार ५०० ते २ हजार रुपयांच्या दरम्यान आहेत. बाजारातील टोमॅटो आवक पुढील काही दिवस कायम राहण्याचा अंदाज आहे. तसेच बाजारावर सरकारच्या धोरणांचा दबावही कायम दिसतो. त्यामुळे टोमॅटोची भावपातळी आणखी काही दिवस कायम दिसू शकते, असा अंदाज टोमॅटो बाजारातील अभ्यासकांनी व्यक्त केला.