Banana Rate : खानदेशात केळी दरात सुधारणांचा कल; कमाल दर १८०० रुपयांवर!

Jalgaon News : केळी दरात सुधारणांचा कल खानदेशात कायम आहे. प्रतिक्विंटल कमाल दर १२०० ते १३०० रुपयांवरून १८०० रुपये दर, असे मागील १८ ते २० दिवसांतील स्थिती आहे. केळीस उठाव आहे, पण आवक मात्र कमी आहे.

मध्य प्रदेशातील बऱ्हाणपूर बाजार समितीतील दर व लिलाव यानुसार केळीचे दर खानदेशात खेडा किंवा थेट खरेदीत निश्चित केले जातात. बऱ्हाणपूर बाजार समितीत केळी दरात सतत वाढ दिसत आहे. तेथे रविवारी (ता.१९) केळीस प्रतिक्विंटल १००१ व कमाल १८०१ रुपये प्रतिक्विंटलचा दर मिळाला.

तर सरासरी १४०० रुपये प्रतिक्विंटलचा दर तेथे होता. किमान दरात तेथेही सतत वाढ झाली आहे. तेथे केळी आवक अजूनही नीचांकी स्थितीत असून, मागील आठ ते १० दिवसांपासून प्रतिदिन सरासरी १० ट्रक (एक ट्रक १० टन क्षमता) केळीची आवक झाली आहे.

खानदेशात सध्या पिलबाग केळीमधून आवक होत असून, प्रतिदिन सरासरी ४५ ट्रक एवढी आवक (एक ट्रक १६ टन क्षमता) मागील १० ते १२ दिवसांत झाली आहे. केळीस कुंभ मेळ्यानिमित्त उठाव आहे. यामुळे केळी दरात सतत वाढ झाली आहे. यात आवक कमी आहे. पिलबाग केळीमधूनही दर्जेदार केळीची आवक सध्या होत आहे.

सध्या जळगाव जिल्ह्यात रावेर, यावल, जामनेर, चोपडा, धुळ्यातील शिरपूर, नंदुरबारातील शहादा, तळोदा भागांत केळीची आवक आहे. आवकेत पुढील महिन्यात किंवा ३० ते ३५ दिवसांनंतर चांगली वाढ होईल, असे संकेत आहेत.

केळीचे दर मागील महिन्यात खानदेशात प्रतिक्विंटल सरासरी ८०० रुपये प्रतिक्विंटल, असे होते. परंतु या महिन्याच्या पहिल्या पंधरवड्यात केळी दर सरासरी १३०० रुपये प्रतिक्विंटल, असे राहिले आहेत.