Kolhapur News: सध्या गुळाची मागणी थंडावली आहे. गुजरातमधून मागणी कमी झाल्याने व्यापाऱ्यांकडून गुळाची खरेदीही धीमीच आहे. दरातही विशेष सुधारणा झालेली नाही. सध्या गुळाचे दर प्रति क्विंटल ४००० ते ४५०० रुपयांपर्यंत स्थिर आहेत. येथील बाजार समितीत होणारी गुळाची आवक रोडावली आहे.
सध्या उन्हाळा तीव्र आहे. गुजरातमध्ये उन्हामुळे बाजारपेठा ओस पडत आहेत. सार्वजनिक कार्यक्रम सातत्याने होत नसल्याने गुळाचा घरगुती वापर कमी झाला आहे. यामुळे तेथील व्यापाऱ्यांनीही गूळ खरेदीला फारसे प्राधान्य दिले नाही. वर्षभर गूळ मिळत असल्याने यंदाही गुळाच्या भर हंगामातही व्यापाऱ्यांनी शीतगृहासाठी गूळ खरेदी करण्याला पसंती दाखवली नाही. जितका विक्रीसाठी लागेल तितक्याच गुळाची खरेदी सध्या व्यापाऱ्यांकडून केली जात आहे.
मागणी नसल्याने बाजार समितीत येणाऱ्या गुळाची विक्रीही फारशा चढ्या दराने होत नसल्याचे चित्र आहे. सध्या जिल्‍ह्यात मोजकीच गुऱ्हाळे सुरू आहेत. यंदा ऊस हंगाम लवकर संपला असून, याचा फटका गुऱ्हाळ घरांनाही बसला. गुळासाठी ऊस जवळपास उपलब्ध होत नसल्याने गुऱ्हाळ मालकांनी जिल्ह्याबाहेरून ऊस आणायला प्राधान्य दिले. सध्या जिल्ह्यातील गुऱ्हाळघरांना स्थानिक भागातील गूळ कमी मिळत असल्याची स्थिती आहे.
अनेक गुऱ्हाळचालक कर्नाटकातून चढ्या दराने उसाची खरेदी करत असल्‍याचे चित्र सध्या गूळ पट्ट्यात आहे. गुळासाठी परिपक्व ऊस आणताना गुऱ्हाळघर चालकांची दमछाक होत आहे. ऊस मिळत नसल्याने गेल्या पंधरवड्यापासून काही गुऱ्हाळघरे बंद आहेत. पंधरवड्यापूर्वी बाजार समितीत एक दिवसाआड सरासरी तीस गाड्या गूळ बाजार समितीत येत होता. आता ही संख्‍या पंधरा ते वीस गाड्‍यांपर्यंत कमी झाली आहे. एखाद्या दिवशी जादा गाड्या आल्यास तितक्या गुळाचे सौदे त्याच दिवशी होत नसल्याचेही चित्र बाजार समितीत आहे.
स्थानिक ऊस मिळत नसल्याने वाहतूक खर्चात वाढ बहुतांशी ठिकाणी उसास चार हजार रुपये प्रती टनांच्या वर दर देऊन उसाची खरेदी केली जात आहे. यामुळे गुळाला जर ४००० रुपयांच्या आत दर मिळाला तर तो आतबट्ट्याचा सौदा ठरत असल्याची माहिती गुऱ्हाळघर चालकांनी दिली. स्थानिक ऊस मिळत नसल्याने कर्नाटकातून ऊस आणला जात आहे. यामुळे वाहतूक खर्चातही वाढ होत असल्याने सध्या जो दर गुळाला मिळत आहे, त्यातून फारसा फायदा होत नसल्याचे गुऱ्हाळघर चालकांनी सांगितले.
कोल्हापूर बाजार समितीतील प्रति क्विंटल गुळाचे दर
दर्जा दर
किमान कमाल
१ ४९०० ४९००
२ ४३०० ४६००
३ ४१०० ४२९०
४ ४०५० ४०९०
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.