Jackfruit Price: सिंधुदुर्गात फणसाला प्रति नगाला ३०० ते ३५० रुपये दर

Sindhudurg News: सिंधुदुर्ग जिल्ह्यात फणस हंगामाला प्रारंभ झाला असून, फणसाच्या प्रति नगाला ३०० ते ३५० रुपये दर मिळत आहे. कापा फणसाला मोठी मागणी ग्राहकांकडून आहे.रासायनिक खते, कीटकनाशकांपासून पूर्णतः अलिप्त असलेले फळ म्हणून फणसाकडे पाहिले जाते. पूर्णतः पांरपरिक पद्धतीनेच फणसाचे उत्पादन घेतले जाते.

काही अपवाद वगळले तर मे महिन्यातच फणस हंगाम सुरू होतो. कोकणात कोवळ्या फणसांची देखील भाजी केली जाते. हे कोवळे फणस पौष महिन्यात अधिकतर उपलब्ध असतात. त्यानंतर पूर्ण तयार झाल्यानंतर भाजीकरिता फणस खरेदी करतात, तर परिपक्व झालेले फणस हे मे महिन्यात विक्रीकरिता येतात.

मे महिन्याच्या पहिल्या आठवड्यापासून जिल्ह्यात परिपक्व फणसांचा हंगाम सुरू झाला आहे. ऐन पर्यटन हंगामात हा हंगाम सुरू होत असल्याने शेतकऱ्यांना दर देखील चांगला मिळतो. फणसामध्ये कापा आणि रसाळ असे दोन प्रकार असतात

कापा फणस अधिक कालावधीसाठी टिकतो त्यामुळे अधिकतर ग्राहक या फणसांची निवड करतात. तर ताबडतोब खाण्यासाठी रसाळ फणस खरेदी करतात. या जातीच्या फणसाचा रसापासून फणसपोळी बनविली जाते.

कापा फणसाला ३५० ते ४०० आकारानुसार त्यापेक्षा अधिक देखील दर मिळत आहे, तर रसाळ फणसाला २५० ते ३०० रुपये दर मिळत आहे. पर्यटन हंगाम बहरात असल्यामुळे हा दर आणखी काही दिवस टिकून राहण्याचा अंदाज आहे. वटपौर्णिमेपर्यंत फणसाला चांगला दर मिळतो.