Pune News: देशातील बाजारात मागील आठवडाभरापासून सोयाबीनच्या भावात सुधारणा दिसून येत आहे. सोयाबीनचे भाव क्विंटलमागे जवळपास ३०० रुपयांनी वधारले आहेत. सोयातेल आणि पेंडेच्या दरात झालेली सुधारणा, प्रक्रिया प्लांट्सची खरेदी आणि खरिपातील पिछाडलेला पेरा यामुळे दराला आधार मिळत आहे.
सोयाबीन बाजारात मागील १० महिन्यांमध्ये दरात विशेष अशी तेजी-मंदी दिसली नाही. सोयाबीनचा बाजार समित्यांमधील भाव प्रति क्विंटल ३ हजार ९०० ते ४ हजार २०० रुपयांच्या दरम्यानच राहीला. तर प्रक्रिया प्लांट्सचे दर ४ हजार ३०० ते ४ हजार ६०० रुपयांच्या पातळीवर दिसले.
जागतिक बाजारात सोयाबीनचा वाढलेला पुरवठा, सोयाबीनचे वाढते गाळप यामुळे सोयापेंडचे भाव दबावात आले होते. याचा थेट परिणाम सोयाबीनच्या दरावर दिसून आला. देशात सोयापेंडला मक्याच्या डीडीजीएसचा पर्याय उपलब्ध झाला. त्यामुळे सोयापेंडची मागणी कमी झाली. परिणामी सोयाबीनचा बाजार दबावातच राहिला.
गेल्या काही महिन्यांपासून सोयातेलाच्या भावात वाढ झाली. मात्र सोयापेंडचे भाव दबावातच होते. त्यामुळे सोयाबीनच्या भावात सुधारणा दिसून आली नाही. मात्र मागील १५ दिवसांमध्ये सोयातेलाचे भावही वाढले आहेत. १६ जुलै रोजी असलेला ११६ रुपयांचा भाव १२७ रुपयांवर पोहोचला. तर सोयापेंडचे भावही ३३ हजार रुपयांवरून ३६ हजारांवर पोहोचले आहेत. सोयातेल आणि सोयापेंडचेही दर वाढल्याने सोयाबीनच्या दराला आधार मिळाला.
मागच्या तीन वर्षांमध्ये सोयाबीनचे भाव चांगले असल्याने शेतकरीही सोयाबीन मागे ठेवत होते. यामुळे उद्योगांना पुरेसे सोयाबीन मिळत होते. त्यांना साठा (स्टाॅक) करून ठेवण्याची गरज नव्हती. यंदाही शेतकऱ्यांकडे मोठ्या प्रमाणात सोयाबीन असेल तसेच पुरवठा चांगला असल्याने दर दबावातच राहतील, असा अंदाज गृहीत धरून उद्योगांनी स्टाॅक केला नाही.
पण यंदा शेतकऱ्यांकडे सोयाबीनचा स्टाॅक खूपच कमी प्रमाणात उपलब्ध आहे. बाजारातील आवक खपूच कमी आहे. त्यातच सोयापेंडला पोल्ट्री आणि इतर उद्योगांकडून मागणी आली. यामुळे सोयाबीनच्या दरात सुधारणा झाली आहे. सोयाबीनचे प्रक्रिया प्लांट्सचे भाव ४ हजार ७०० ते ४ हजार ८०० रुपयांच्या दरम्यान पोचले आहेत.
पेरणी कमी
चालू खरिपात देशात सोयाबीनचा पेराही कमी झाला आहे. सरकारच्या अहवालात सोयाबीनची पेरणी आतापर्यंत ४ ते ५ टक्क्यांनी कमी असल्याचे दिसत आहे. मात्र शेतकरी आणि व्यापारी सोयाबीनची पेरणी किमान १० टक्क्यांपर्यंत कमी झाल्याचे सांगत आहेत. पेरणीचा अंतिम आकडा अजून पुढे आला नसला तरी यापुढे पेरणी होणार नाही. त्यामुळे यंदा सोयाबीनचा पेरा कमीच राहणार आहे. तसेच पुढील काळात पावसाचा दणकाही पिकाला बसू शकतो. नुकसान होण्याचीही भीती आहे. त्यामुळे सोयाबीनच्या भावाला आधार मिळत आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.