Gondia News : रब्बी हंगामाकरिता जिल्हा मार्केटिंग फेडरेशनला ११ लाख क्‍विंटल धान खरेदीचे उद्दिष्ट देण्यात आले होते. शासनाने दिलेल्या उद्दिष्टाची पूर्ती नुकतीच झाल्याने आता वाढीव उद्दिष्ट मिळणार की खरेदी बंद होणार या बाबत स्पष्टता नाही. परिणामी, नोंदणी केलेल्या शेतकऱ्यांपैकी २६ हजारांवर शेतकरी धान विक्रीच्या प्रतीक्षेत आहेत.
नागपूर विभागातील सहापैकी पाच जिल्हे हे धान उत्पादक म्हणून ओळखले जातात. त्यामध्ये गोंदियाची ओळख ही राइस सिटी, तर भंडाऱ्याला धानाचे कोठार म्हणून मान्यता आहे. त्यासोबतच गडचिरोली, चंद्रपूर, नागपूर या जिल्ह्यांत देखील धानाखालील क्षेत्र आहे. या जिल्ह्यांमध्ये खरिपानंतर रब्बी हंगामात देखील धानाची खरेदी हमीभावाने होते.
जिल्हा मार्केटिंग फेडरेशन आणि आदिवासी विकास महामंडळाकडून धान खरेदी केली जाते. शेतकऱ्यांना हमीभावापेक्षा कमी दर मिळू नये याकरिता शासनस्तरावरून बाजारात हस्तक्षेप होतो. रब्बी हंगामात गोंदिया जिल्ह्यात ४६ हजार हेक्‍टरवर धानाची लागवड करण्यात आली. हेक्‍टरी ७० क्‍विंटलची उत्पादकता यातून मिळाली.
रविवारपर्यंत मार्केटिंग फेडरेशनच्या १८१ केंद्रांवर १० लाख ८९ हजार ३५ क्‍विंटल धानाची खरेदी झाली होती. सोमवारी (ता. १६) हे उद्दिष्ट पूर्ण झाले. परिणामी नोदणीकृत शेतकरी धान विक्रीच्या प्रतीक्षेत आहेत. शासनस्तरावरून खरेदीला मुदतवाढ मिळेल, अशी अपेक्षा या शेतकऱ्यांना आहे. शासकीय धान खरेदी केंद्रावर धानाची विक्री करण्यासाठी पोर्टलवर नोंदणीची सक्‍ती होती.
त्यानुसार तब्बल ६० हजार २७८ शेतकऱ्यांनी नोंदणी केली. यापैकी २४ हजार ६४५ शेतकऱ्यांनी आतापर्यंत धानाची विक्री केली आहे. नोंदणी केलेल्या शेतकऱ्यांपैकी जवळपास २६ हजारांवर शेतकरी धान विक्रीच्या प्रतीक्षेत आहेत. अशातच शासनाने धान विक्री उद्दिष्टात वाढ न केल्यास शेतकऱ्यांना खुल्या बाजारात धान विकावा लागणार आहे. यातून प्रति क्‍विंटल सरासरी ६०० ते ७०० रुपयांचे नुकसान सोसावे लागणार आहे.
धान चुकाऱ्यांनी प्रतीक्षा
रब्बी हंगामातील शासकीय धान खरेदी सुरू होऊन दोन महिन्यांचा कालावधी लोटला आहे. आतापर्यंत मार्केटिंग फेडरेशनकडून २५० कोटी रुपयांचे धान खरेदी करण्यात आले. २४ हजारांवर शेतकऱ्यांकडून खरेदी करण्यात आलेल्या या धानासाठी अद्यापही निधीची तरतूद करण्यात आलेली नाही. त्यामुळे आता शेतकऱ्यांना चुकाऱ्यांची प्रतीक्षा लागली आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.