Gold Rate : सोने दरात एका दिवसात चारशे रुपयांची वाढ

जळगाव : सोन्याच्या दरात (Gold Rate) एका दिवसात चारशे रुपयांची वाढ झाली तर चांदीच्या दरात (Silver Rate) एक हजारांची वाढ (विना जीएसटी) झाली आहे. गेल्या गुरुवारी सोन्याच्या दराने प्रतितोळा ५६ हजारांचा (जीएसटीसह) आकडा पार होता. चांदीचे दरही गुरुवारी (ता. २३) ७० हजारांच्या जवळपास पोचले होते.

गेल्या दोन महिन्यांपासून सोने- चांदीच्या दरात प्रचंड चढउतार सुरू आहे. महिनाभरापासून तर हे दर सातत्याने वाढत आहेत. आंतरराष्ट्रीय बाजारपेठेतील आर्थिक उलाढाली त्याला कारणीभूत असल्या तरी भारतात साधारणतः लग्नसराईच्या हंगामात सोने-चांदीच्या दरात वाढ होते, असे मानले जाते.

शनिवारी (ता. २४) सोन्याचे दर ५४ हजार प्रती तोळा तर चांदीचे दर ६७ हजार (विना जीएसटी) होते. रविवारी (ता. २५) सोन्याच्या दरात ४०० ची वाढ होऊन ते दर ५४ हजार ४०० वर पोचले. चांदी ६७ हजार (प्रती किलो) वरून ६८ हजारांवर पोचली आहे. सोन्या चांदीतील चढउताराने गुंतवणुकदारही चक्रावले आहे. सोन्या, चांदीच्या दरात केव्हा घट होते याची ते वाट पाहत आहेत.