Moong Procurement : मध्य प्रदेश सरकारची अखेर मूग खरेदीची घोषणा

Nagpur News : मूग पीक काढणीच्या अवस्थेत आले असताना त्यावर तणनाशकाची फवारणी केली. त्यामुळे पीक विषयुक्त झाल्याचा ठपका ठेवत हमीभावाने खरेदीला नकार देणारे मध्य प्रदेश सरकारने शेतकऱ्यांपुढे नमती भूमिका घेतली आहे. तसेच मूग पिकाची हमीभावाने खरेदीची घोषणा केली आहे.

दरम्यान मूग खरेदी करण्यात नकार देणाऱ्या सरकारविरोधात शेतकऱ्यांमध्ये संतापाची लाट उसळली होती. सरकारच्या या धोरणाचा भारत कृषक समाजासह विविध शेतकरी संघटनांनी विरोध करीत आपल्यास्तरावर आंदोलनाचा मार्ग पत्करला. काही संघटनांनी सरकारविरोधात तीव्र आंदोलन छेडले.

संपूर्ण मध्य प्रदेश राज्य शेतकरी आंदोलनामुळे ढवळून निघाले होते. त्यामुळे सरकारमध्ये अस्वस्थता निर्माण झाली होती. शुक्रवारी (ता. १३) अखेर नमते घेत मध्य प्रदेश सरकारने हमीभावाने मूग खरेदीस मान्यता दिली. त्याकरिता गुरुवार (ता. १९) पासून नोंदणीला सुरुवात होणार आहे. त्यानंतर जुलै महिन्यात प्रत्यक्ष खरेदीला सुरुवात होईल, असे सांगितले जाते.

गेल्या हंगामात १५ ते ३० जुलै या कालावधीत मुगाची हमीभावाने खरेदी करण्यात आली. नरसिंगपूर जिल्ह्यात मध्य प्रदेशातील एकूण लागवडीच्या ९६ टक्‍के मूग लागवड राहते. सरकारने हमीभावाने खरेदीस नकार दिल्याने खुल्या बाजारात दर दबावात आले होते. त्यातच काढणीच्या वेळी आलेल्या पावसाचा फटका बसल्याने उत्पादकता घटली. असा दुहेरी मार शेतकऱ्यांना बसला.

दरवर्षी उत्पादित मुगाची सरकारकडून हमीभावाने खरेदी होत असल्याने शेतकऱ्यांना त्याचा लाभ होत असतो. गेल्या हंगामात ८६८२ रुपये क्‍विंटलने मुगाची खरेदी करण्यात आली. त्यात यंदा ८६ रुपयांची वाढ करीत हमीभाव ८७६८ रुपये जाहीर करण्यात आला आहे.

त्यामुळे हे पीक या भागातील शेतकऱ्यांसाठी फायदेशीर ठरणारे होते. परंतु पीक लागवड ते काढणी आणि दरम्यान मूग पिकाच्या हंगामाअखेरीस तणनाशकाचा वापर करण्यात आला. या सर्व कारणांमुळे मूग विषयुक्‍त झाल्याचा आरोप करीत सरकारकडून यंदा हमीभावाने मूग खरेदीस टाळाटाळ केली जात होती.