Indian Poultry Industry: भारतीय प्रजातीच्या पोल्ट्री ब्रीडला अफ्रिकेतून मागणी

Nashik News: जागतिक पोल्ट्री ब्रीड उत्पादनांत ‘एव्ही ब्रॉयलर’ या भारतीय कंपनीने स्वत:चे स्थान निर्माण केले आहे. आफ्रिका खंडातील सेनेगल या देशातील सोरा होल्डिंग या कंपनीसोबत एव्ही ब्रॉयलरचा सामंजस्य करार नुकताच ‘सह्याद्री फार्म्स’ नाशिक येथे करण्यात आला. याबाबतची माहिती कंपनीचे अध्यक्ष तथा व्यवस्थापकीय संचालक श्रीकृष्ण गांगुर्डे यांनी शुक्रवारी (ता. २८) पत्रकार परिषदेत दिली. या वेळी सोरा होल्डिंगचे अध्यक्ष सिस्कोम माऊ, ‘अॅडफिड’चे संचालक मॅलिक सेने, डॉ. रत्नाकर पाटील, मानसी गांगुर्डे व उपाध्यक्ष डॉ. इलिमाने डायने उपस्थित होते.

अमेरिकन व युरोपीयन उत्पादने व महागडे तंत्रज्ञानापेक्षा भारतीय ब्रीड व तंत्रज्ञान परवडणाऱ्या दरात मिळत असल्याने एव्ही ब्रॉयलर (भारत) व सोरा होल्डिंग्ज यांच्यात हा सामंजस्य करार करण्यात आला. याबाबत श्रीकृष्ण गांगुर्डे यांनी सांगितले, की सेनेगल देश व एकूणच आफ्रिका खंड हा ब्रॉयलर पक्षी व अंड्यांचा मोठा ग्राहक देश आहे.

या देशाला अमेरिका व युरोपीय देशांतून होणाऱ्या आयातीवर अवलंबून राहावे लागत आहे. मात्र हे अवलंबित्व खर्चिक असल्याचे सेनेगल देशातील पोल्ट्री व्यावसायिकांचे म्हणणे आहे. त्यामुळे भारतातून येणाऱ्या पोल्ट्री ब्रीडला प्राधान्य देण्यास सुरुवात केली आहे. त्यासाठी सेनेगलमधील पोल्ट्री अनुवंश आयातदार व ग्राहकांनी एव्ही ब्रॉयलरच्या ब्रीडला पसंती दिली आहे. या संदर्भात द्विपक्षीय सामंजस्य करार झाल्याने भारतीय पोल्ट्री उत्पादनांच्या या दोन्ही देशांतील व्यापाराला चालना मिळणार आहे.

ब्रीड उष्णकटिबंधीय हवामान परिस्थितीत काटक, अनुकूल एव्ही ब्रॉयलर्स ही भारतीय मालकीची पहिली प्युअर-लाइन ब्रॉयलर जेनेटिक (आनुवंशिक) कंपनी आहे. या कंपनीमार्फत कोणत्याही प्रतिकूल हवामान परिस्थितीला अनुकूल असा उत्कृष्ट ब्रॉयलर आनुवंशिक पक्षी तयार करण्यावर भर दिला जातो. ग्रामीण भागात पायाभूत संसाधने आणि नवीन तंत्रज्ञानाची उपलब्धता नसते. यावर उपाय म्हणून ‘एव्ही ब्रॉयलर्स’ने ब्रॉयलर ब्रीड विकसित केले आहे. हे ब्रीड उष्णकटिबंधीय हवामान परिस्थितीत काटक, अनुकूल तसेच चांगली वाढ व वजन देणारे आहे. इतर प्रजातीच्या तुलनेत यात मांसाचे प्रमाण ३ टक्के जास्त आहे.