CCI Cotton Procurement : ‘सीसीआय’ फेब्रुवारीत गुंडाळणार कापूस खरेदी

Amaravati News : हमीदराने कापसाची भारतीय कापूस महामंडळ (सीसीआय) करीत असलेली खरेदी जानेवारीअखेर बंद होणार आहे. कापसाचे दोन वेचे झाले असून उलंगवाडीची वेळ आली असून त्यानंतरचा कापूस फरदड या श्रेणीत येत असल्याने ‘सीसीआय’ त्याची खरेदी करीत नाही. परिणामी खासगी बाजारातील कापसाची उलाढाल वाढण्याची शक्यता आहे.

खरीप हंगामातील कापसाची मोठी उलाढाल सध्या बाजारपेठेत आहे. कापूस पणन महासंघ मोडीत निघाल्याने ‘सीसीआय’मार्फत कापसाची हमीदराने खरेदी सुरू आहे. कापसाचे दर रुईच्या उताऱ्यावर ठरतात. पहिल्या वेच्यातील फेअर दर्जाच्या कापसापासून रुईचा उतारा ३८ किलोवर येतो. त्यास ‘सीसीआय’ने लांब धाग्याच्या कापसास प्रति क्विंटल ७,५२५ रुपये दर दिला.

आता दुसऱ्या वेच्यातील कापसाची आवक होत असून त्यापासून रुईचा उतारा ३५ किलोच्या जवळपास येत असल्याने हमीदरात शंभर रुपयांची कपात करण्यात आली आहे. शेतकऱ्यांनी त्यांच्याकडील कापूस खुल्या बाजाराच्या तुलनेत ‘सीसीआय’ला विकण्यास प्राधान्य दिले आहे. खुल्या बाजारात सरासरी ७,३६२ रुपये दर आहे. कापसाचा हंगाम आता उलंगवाडीवर आला आहे.

भाव आणखी वधारतील या अपेक्षेने काही शेतकऱ्यांनी कापूस घरात साठवून ठेवला आहे. हा कापूस ‘सीसीआय’ची खरेदी बंद झाल्यावर बाहेर येण्याची शक्यता आहे. दरम्यान ‘सीसीआय’ने हमीदर कमी करीत कापसाच्या खरेदीचे प्रमाणही कमी केले आहे. जानेवारी अखेरपर्यंत ‘सीसीआय’ची खरेदी चालणार असून फेब्रुवारीत खरेदी केंद्र बंद करण्यात येणार असल्याचे सांगण्यात आले.