Pune News : गुलटेकडी येथील पुणे कृषी उत्पन्न बाजार समितीत (ता. ८) सांगली जिल्ह्यातील उटगी (ता. जत) येथील शेतकरी उमेश लिंगाडे यांच्या शेतातील सुमारे ३१ बॉक्स (२४८ किलो) पिवळ्या ड्रॅगन फ्रूटची आवक झाली. लिंगाडे हे लाल ड्रॅगन फ्रूटची गेल्या ८ ते ९ वर्षांपासून यशस्वी शेती करीत आहेत.
मात्र नव्या पिकाच्या शोधात त्यानी २०२१ मध्ये सव्वा एकर क्षेत्रावर पिवळ्या ड्रॅगन फ्रूटची लागवड केली. पिवळ्या आकर्षक ड्रॅगन फ्रूटला मागणी असल्याने रविवारी (ता. ८) पुणे बाजार समितीमधील रावसाहेब कुंजीर यांच्या गाळ्यावर प्रति किलोला १२० ते २०० रुपये दर मिळाल्याचे लिंगाडे यांनी सांगितले.
लिंगाडे यांनी सव्वा एकर क्षेत्रावर ५०० खांबावर दोन हजार रोपांची लागवड केली आहे. याचे उत्पादन सुरू झाले असून, रविवारी (ता. ८) पहिलीच आवक बाजार समितीमध्ये आणल्याचे त्यांनी सांगितले. लाल आणि पिवळ्या ड्रॅगन फ्रूटविषयी लिंगाडे म्हणाले, की दोन्ही फळांमध्ये विशेष फरक नाही.
मात्र पिवळ्या फळाचे साल कडक आणि जाड असल्याने याची टिकवण क्षमता लाल फळापेक्षा ८ ते १० दिवसांनी अधिक आहे. तर पिवळ्या फळाचा गर पांढरा असून, तुलनेने गोड आहे. आणखी पिवळ्या फळांची बाजारात आवक कमी असल्याने मागणी चांगली आहे. वेगळे आणि आकर्षक फळ म्हणून मागणी वाढत आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.