Banana Market : खानदेशात केळीची आवक वाढू लागली

Jalgaon News : खानदेशात केळीची आवक वाढत आहे. दर १८०० ते २१०० रुपये प्रतिक्विंटलवर स्थिर असून, सध्या प्रतिदिन ३१ ट्रक (एक ट्रक १६ टन क्षमता) केळीची आवक होत आहे. केळीला उत्तरेकडे उठाव असल्याने दरही टिकून आहेत.

खानदेशातून पुढील २५ दिवसांनंतर केळीची परदेशात निर्यातही सुरू होईल. सध्या आगाप लागवडीच्या मृग बहर बागा व पिलबाग केळीमधून आवक सुरू आहे. तसेच उशिरा लागवडीच्या कांदेबाग केळीतही काढणी सुरू आहे.

जळगाव जिल्ह्यातील रावेर, यावल, मुक्ताईनगर, जामनेर, धुळ्यातील शिरपूर, नंदुरबारातील शहादा, तळोदा व अक्कलकुवा भागात केळीची आवक सुरू झाली आहे. मागील पंधरवड्यात खानदेशात केळीची प्रतिदिन २४ ट्रक आवक झाली होती. त्यात पाच ते सहा ट्रकने मागील काही दिवसांत वाढ झाली आहे.

केळीची आवक मागील पंधरवड्यातील काही दिवस नीचांकी स्थितीत होती. त्यात पुढे आणखी वाढ होईल. थंडीमुळे काढणी रखडत सुरू आहे. तसेच घड थंडीत पक्व होत नसल्याने अनेक बागांमधील काढणी अपेक्षित वेळेत सुरू झालेली नाही.

पुढे तापमानात जशी वाढ होईल, तशी केळीची आवक वाढेल, असे संकेत आहेत. दर्जेदार किंवा निर्यातीच्या केळीचे दर २३०० रुपये प्रतिक्विंटल आहेत. काही शेतकऱ्यांच्या केळीची जामनेर, जळगाव भागांतून निर्यातही झाली आहे.

बऱ्हाणपुरातील आवकही कमी

मध्य प्रदेशातील बऱ्हाणपूर येथेही केळीची आवक कमी आहे. तेथे जळगाव जिल्ह्यातील मुक्ताईनगर, रावेर भागांतूनही केळीची पाठवणूक केली जाते. परंतु सध्या रावेर, मुक्ताईनगर भागात केळीची आवक कमी असल्याने दर टिकून आहेत. उठावही असल्याने बऱ्हाणपुरातील पाठवणूक फारशी सुरू नाही, अशी माहिती केळी उत्पादक शेतकरी आणि व्यापाऱ्यांनी दिली.