Animal Care : जनावरांवरील प्रथमोपचाराच्या सुविधा पूर्ण करा ः मित्तल

Nashik News : प्रत्येक पशुवैद्यकीय दवाखान्यात माणसाच्या सोयीप्रमाणेच जनावरांसाठी सोयीसुविधा आवश्यक आहेत. सर्व पशुवैद्यकीय दवाखान्यात जनावरांच्या पिण्याच्या पाण्याची व्यवस्था गरजेचे आहे.

तसेच जनावरांच्या आजारांच्या व प्रथमोपचाराच्या आवश्यक सूचना पशुपालकांसाठी असाव्यात त्या दृष्टीने शासनाच्या माध्यमातून त्या पूर्ण कराव्यात, अशा सूचना जिल्हा परिषदेच्या मुख्य कार्यकारी अधिकारी आशिमा मित्तल यांनी अधिकाऱ्यांना दिल्या.

जिल्हा परिषदेच्या मुख्य कार्यकारी अधिकारी आशिमा मित्तल यांनी बुधवारी (ता. ५) नैताळे (ता. निफाड) येथील श्रेणी–१ च्या पशुवैद्यकीय दवाखान्यास भेट देऊन कामधेनू कायापालट या योजनेअंतर्गत सुरू असलेल्या कामाची पाहणी केली.

पशुवैद्यकीय दवाखान्याबाबत निफाड तालुका पशुधन विकास अधिकारी डॉ. पंकज कळसकर व डॉ. तोरण पवार यांनी सविस्तर माहिती दिली. मित्तल यांनी स्वतः पशुवैद्यकीय दवाखान्याची आतून पाहणी केली.

याप्रसंगी निफाड पंचायत समितीचे गटविकास अधिकारी तुकाराम जाधव, सुनील पाटील, बांधकाम विभागाचे पुरी, रूपाली जाधव, मोतीराम भवर, वैद्यकीय अधिकारी पुरुषोत्तम चारुडे, ग्रामविकास अधिकारी उज्वला भोईर, रोशन बोरगुडे, गणपत सुरासे यांच्यासह पशुवैद्यकीय दवाखान्याचे कर्मचारी उपस्थित होते.