Lumpy Vaccination : तेवीस हजार ५०४ जनावरांना सिंधुदुर्ग जिल्ह्यात लसीकरण

सिंधुदुर्गनगरी : लम्पी स्कीनच्या (Lumpy Skin Disease)अनुषंगाने खबरदारी म्हणून जिल्हा पशुसंवर्धन (Livestock) विभागाने जिल्ह्यात लसीकरणाला सुरुवात केली असून आतापर्यंत २३ हजार ५०४ जनावरांना लसीकरण (Vaccination)पूर्ण करण्यात आले आहे. जिल्ह्यातील गायवर्गीय १ लाख ५ हजार ८ जनावरांना लसीकरणाचे उद्दिष्ट आहे.

जिल्ह्यात अजूनही लम्पी स्कीनचा प्रादुर्भाव झालेले एकही जनावरे नाही. तरीदेखील खबरदारीचे सर्व उपाय पशुसंवर्धन विभागाकडून सुरू आहेत. सुरुवातीला जिल्ह्याकरिता १० हजार लसी उपलब्ध झाल्या होत्या. त्यानंतर पुन्हा २५ हजार लसी उपलब्ध झाल्या आहेत.

जिल्हा पशुसंवर्धन विभागाची दहा ते पंधरा पथके लसीकरण करण्यात गुंतली आहेत. आतापर्यंत २३ हजार ५०४ जनावरांना लसीकरण पूर्ण झाले आहे.

दरम्यान, पशुसंवर्धन विभागाकडे १२ हजार लसी उपलब्ध असून पुढील चार दिवसांत आणखी ५० हजार लसी उपलब्ध होणार आहेत.

जिल्ह्यातील एकूण १ लाख ५ हजार ८ गायवर्गीय जनावरांना लसीकरण करण्याचे उद्दिष्ट पशुसंवर्धन विभागाने ठेवले आहे. सध्या ज्या एकाच ठिकाणी जनावरांची संख्या जास्त आहे, तेथेच लसीकरण केले जात आहे.

जिल्ह्याला प्राप्त झालेल्या लसींतून २३ हजार जनावरांचे लसीकरण पूर्ण करण्यात आले आहे. येत्या चार-पाच दिवसांत जिल्ह्याला आणखी ५० हजार लसी उपलब्ध होणार आहेत. शेतकऱ्यांनी लसीकरणासाठी सहकार्य करावे.

- डॉ. विद्यानंद देसाई, जिल्हा पशुसंवर्धन अधिकारी, सिंधुदुर्ग.