Lumpy Skin Disease : नगर जिल्ह्यात ९०० पशुधनांना प्रादुर्भाव

ॲग्रोवन वृत्तसेवा

नगर ः लम्पी स्कीनमुळे (Lumpy Skin Disease) नगर जिल्ह्यातील बहुतांशी पशुधनांना प्रादुर्भाव झाला आहे. जिल्हा परिषद आणि पशुसंवर्धन विभागाने लसीकरण मोहीम जोमाने सुरू केली आहे. मात्र, पाऊस त्यावर पाणी फेरत आहे. कर्जत-जामखेडमध्ये आमदार रोहित पवार (Rohiy pawar) यांनी, तर संगमनेर तालुक्यात राजहंस दूध संघाचेही लसीकरणात सहकार्य मिळत आहे. त्यांनी अनुक्रमे १ लाख व ८० हजार डोस दिले आहेत. त्यांची यंत्रणाही विभागाच्या मदतीला आहे.

नगर जिल्ह्यात लम्पी स्कीनची बाधा वेगाने वाढत आहे. त्यामुळे पशुसंवर्धन विभागाने वेगाने लसीकरण सुरू केले आहे. कर्जत-जामखेडमध्ये आमदार रोहित पवार, संगमनेर तालुक्यात राजहंस दूध संघाचे अध्यक्ष रणजितसिंह देशमुख यांच्यामुळे लसीकरण वेगात होण्याला हातभार लागत आहे. त्यामुळे आतापर्यंत जिल्हाभरातील तब्बल ८ लाख ६८ हजार १४६ लसीकरणाचे उद्दिष्ट ठेवले आहे. आतापर्यंत १४७ गावांत बाधित जनावरे आढळली आहेत. या गावांतील सुमारे पाच किलोमीटरच्या परिघात उपाययोजना केल्या जात आहेत. तब्बल ७९१ गावांत अलर्ट देण्यात आला आहे. सध्या जिल्ह्यात लम्पी स्कीनचा पीकटाइम आहे. त्यामुळे आगामी चार दिवसांत बाधित जनावरांचा आकडा वाढू शकतो. बाधित जनावरांमध्ये गायींचीच संख्या सर्वाधिक आहे.