Livestock Census : पशुपालकांनो जनावरांची खरी माहिती द्या

Kolhapur News : जिल्ह्यात पशुसंवर्धन विभागाकडून पशुगणनेस सुरुवात झाली आहे. २८ फेब्रुवारी २०२५ पर्यंत ही मोहीम राबविण्यात येणार आहे. पशुगणना मोहिमेत गायवर्ग, म्हैस वर्ग, शेळी-मेंढी, अश्व, वराह, कुक्कुटपक्षी, पशुपालनात वापरली जाणारी यंत्रसामुग्री यांची गणना केली जाणार आहे.

या पशुगणनेच्या आधारावर शासनाकडून विविध धोरण, योजना आखल्या जातात. निधीची उपलब्धता केली जाते. शिवाय पशुवैद्य‌कीय दवाखान्याच्या कार्यक्षेत्रात किती पशुधन आहे. त्यानुसार लसीकरण, औषधांचा पुरवठा केला जातो. त्यामुळे आपल्याकडील जनावरांची खरी माहिती पशुपालकांनी प्रगणकांना द्यावी, असे आवाहन प्रभारी जिल्हा पशुसंवर्धन उपायुक्त डॉ. महेश शेजाळ यांनी केले.

ग्रामीण भागासाठी दर ३ हजार कुटुंबांमागे एक प्रगणक तर शहरी भागासाठी ४ हजार कुटुंबांमागे एक प्रगणक नियुक्ती करण्यात आली असून जिल्ह्यात एकूण २७७ प्रगणक व ७१ पर्यवेक्षकांची या कामासाठी नेमणूक करण्यात आली आहे. जनगणनेच्या धर्तीवरच ही मोहीम राबवली जाते. यंदाची पशुगणना सोमवारपासून (ता. २५) सुरू होत आहे.

या अनुषंगाने पशुसंवर्धन विभागाकडून तयारी करण्यात आली आहे. पशुगणनेसाठी प्रगणकांची व पर्यवेक्षकांची नेमणूक केली आहे. त्यांच्या प्रशिक्षणाचे नियोजन पशुसंवर्धन पंधरवड्यामध्ये डॉ. शेजाळ व डॉ. बाबर यांच्या मार्गदर्शनाखाली डॉ. शशांक कुलकर्णी यांनी केले असून तालुकानिहाय प्रशिक्षण देण्यात आले आहे.

जिल्ह्यात ग्रामीण भागात १ हजार २५५ गावांसाठी २०५ प्रगणक व ५५ पर्यवेक्षक असून, शहरी भागासाठी ७२ प्रगणक व १६ पर्यवेक्षक असे एकूण २७७ प्रगणक व ७१ पर्यवेक्षक नेमण्यात आले आहेत. पशुधन पर्यवेक्षक पदविका अभ्यासक्रम पूर्ण केलेल्यांची या कामासाठी नियुक्ती करण्यात आली आहे. प्रगणकांना मानधन आणि वेगळा मोबदला दिला जाणार असल्याचे डॉ. कुलकर्णी यांनी कळविले.